Dy. CM-in R Vanlawma lungphun a hawng

November 10, Zirtawpni khan deputy chief minister Tawnluia chuan Maubuanga Awithangapa Thlan hmun bulah R Vanlawma hriatrengna lungphun a hawng.

Awithangpa Hall-a lungphun hawnna inkhawmah dy. CM Tawnluia chuan, R Vanlawma lungphun chu Maubuang khua chauhin an phun a ni lo a, Mizoram pumpuiin an phun tláng vek tih a sawi a, "Pu R Vanlawma kha Born Nationalist - Mizo hnam hmangaih tura lo piang niin, a hnathawh leh Mizoram tana a thil tih a chhuanawm tak zet a ni. Mi pakhat ni si, pawl hrang hrangin an chawimawi leh a sulhnu an hriat reng a ni a, ṭhangtharte'n a nunah zir tur tam tak an nei a ni," a ti.

R Vanlawma hian lehkhabu paruk a ziak a - ‘Ka ram leh Kei’ Vol-1&2 leh Awithangpa Chanchin tihte chu a lar zualte an ni. Kum 1998 khan Padma Shri Award in Literature & Journalism-ah a lo dawng tawh a ni.

Lungphun hawnnaah hian Mizo Academy of Letters, Mizo Writters Association, MZP leh Lelte hruaitute an tel a ni.