Bangalore-ah Zirna Kûtpui 2022 hmang

Bangalore-a Mizo Students Association chuan November 11, Zirtawpni khan The United Theological College-a Tagore Hall-ah 'Zirna Kûtpui 2022' an hmang a, Mizoram Youth Commission (MYC) chairman Dr Vanlalṭanpuia, MLA in a hmanpui. Bangalore Mizo zirlaite'n a ṭul apianga an hman atan Rs 50,000 a hlan nghal a ni.

Dr Vanlalṭanpuia chuan, tun dinhmunah Bangalore chu India ram khawpui zinga Mizo zirlaite'n an bawh nasat ber hmun a nih thu a sawi a, "India rama zirna kalphung hi zawi zawiin a inher danglam zel a, mahni line ṭheuha thiamna bik nei lo tan chuan hna ṭha hmuh a har takzet tawh. Inthlahdah leh dâwngdah taka zirna kalpuite tan chuan hmun a awm ta meuh lo a tih theih,"a ti a, zirlaite chu tum nei leh thawhrim tak takna nen bei turin a fuih.

MYC in Super IAS programme (full sponsorship) leh Mega Hybrid Coaching te, Local Level Grooming Programme a buatsaih ṭhinte chu ngaihven fo tur te, zirna ngawr ngawr piah lamah mahni theihna leh thiamnate nasa taka tipung turin a chah bawk.

MYC Chairman hian hian BMA hruaitute ngen angin Mizoram House sakna tur atana Mizoram sorkarin ram a lei fel tawh hmunhma a tlawh nghal a; harsatna leh mamawh an lo thlente chu Mizoram Chief Minister hnenah uluk taka a lo thlen tur thu a hrilh a ni.