Covid-19 vei enkawl lai mi 39 an awm

November 11, Zirtawpni leh November 12, Inrinni khan Mizoramah Covid-19 vei mi pahnih ve ve hmuh chhuah a ni a, Inrinni khan hripui vei dam tawh mi 10 leh nimin khan mi pathum an chhuak a, thi an awm lo. Nimin tlai khan Covid-19 positive mi 39 enkawl mek an ni.

IDSP aṭanga thu dawn danin, Zirtawpnia Covid-19 positive hmuh chhuah mi pahnih hi Aizalw district ve ve an ni a, swab sample 90 endik aṭangin positivity rate chu 2.00% a ni. Inrinnia hmuh chhuahte hi Aizawl leh Lunglei district mi pakhat ve ve an ni a, swab samples 39 endik niin, positivity rate chu 5.13% a tling.

Mizoramah swab sample endik tawh niin, Covid-19 vei 2,38,913 hmuh chhuah a ni tawh a, a pumpuia positivity rate 12% a ni. Nimin tlai dar 3 thlengin mi 2,38,148 (99.68%) chhuahtir an ni tawh a, mi 726 (0.30%) thi tawhin, enkawl mek mi 39 (0.02%) an awm.

Nimin tlai dinhmun angin, Mizorama district 11 zinga pasarih - Siaha, Champhai, Kolasib, Serchhip, Lawngtlai, Khawzawl leh Hnahthial district-ahte Covid-19 positive an awm tawh rih lo a; positive awm tamna ber Mamit district-ah mi 17 an awm a ni.