KHAWTHLIR

KTP-in thisen pe
KṬP, Zonuam Pastor Bial chuan November 12, Inrinni khan Zonuam Kohhran Hall-ah thisen pek an huaihawt a, Zoram Medical College blood bank tan thisen unit 55 an pe a, petute mipa 44 leh hmeichhia 11 an ni.

Saitualin chhuang
Saitual Welfare, Aizawl chuan thuchhuah siamin Rokunga Award, 2021 dawng tura Malsawmkima, Saitual Venglai thlan chhuah a ni chu lawmawm an tih thu tarlangin, "Saitual fahrin zinga hetiang hùm luah thei kan nei hi kan chhuang takzet. Midang tana a inpekna hlu tak hi entawn tlak leh ngaihsan phu hliah hliahah kan ngai," an ti.

Speaker-in hmanpui
Assembly speaker Lalrinliana Sailo chuan November 12, Inrinni khan a bial chhung Khawruhlian Vengthar Branch YMA-in an dincham vawi 32-na an lawmna hun a hmanpui. Lalrinliana Sailo chuan, YMA chu Mizo hnam himna tur atana Pathian hmanrua a nih thu sawiin, "YMA leh kohhrante ṭawngṭaina avanga he ram leh hnam pawhin tun hun hi thleng mek kan ni," a ti. Khawruhlian Vengthar Branch YMA hi November 12, 1990 ah Khawruhlian Branch YMA aṭanga indangin tunah hian members 645 an awm mek.

CS-in tlawh
Chief secretary Dr Renu Sharma chuan November 12, Inrinni khan Lawngtlai district-a Mizoram sorkar leh sorkar laipui hnuaia hmunhma leh hmalakna hrang hrangte a tlawh. Lawngtlai District Hospital hotute'n harsatna leh mamawh an neih an lo thlente chu Chief Secretary chuan a theih anga buaipui a tum thu a hrilh a; hmunhma hrang hranga hmasawnna tur leh hmalak ngaihnate chu DC leh thawktute a sawipui nghal zel a ni.

MLA-in hawng
Lengteng bialtu MLA L Thangmawia chuan November 12, Inrinni khan a bial chhung Vankal khuaa MLA fund hmanga sak health clinic centre building a hawng. L Thangmawia chuan, "Lengteng biala health sub centre awm lohna khaw pali - Vankal, Puilo, Changzawl leh Hrianghmunte pawh health clinic centre-ah hlankai an ni tawh a, Puilo khuaah tunah a building sak mek a ni a, a bakah chuan MLA fund leh fund dang remchang hmangin a building leh thawktu dah fel vek an ni tawh," a ti.