AMC-in property tax hmangin Aizawl mipui an rawk mek - MPCC

Mizoram Pradesh Congress Committee (MPCC) chuan, MNF kaihhruai Aizawl Municipal Corporation (AMC) sorkar chu property tax hmanga mipui rawkah an puh.

MPCC Media hruaitute chuan nimin khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, AMC huam chhung veng hrang hrangah property tax khawn mek a nih thu sawiin, "Property tax punna rate sang lutuk avangin chhungkaw tam tak an buai hle. Nikum 2021-22 a tax an pek zat aṭanga 60%-80% vela pung chhungkaw tam tak an awm," a ti.

Dr Lallianchhunga chuan, property tax chu India ramah municipal-te sum hnár lian ber pakhat a nih ṭhin thu sawiin, "AMC huam chhungah pawh June 16, 2015 aṭangin property tax lak ṭan a ni," a ti a; dan ang chuan property tax lak zat tur chu kum tin January thlaah Board of Councillors-in a hun lai milin an siam ṭhin tur a nih thu a sawi.

MPCC Media Chairman chuan, thil man hlutna sang zelah property tax chu a pung tur a nih thu sawiin, "Miin an in an zauh emaw, an sak belh emaw, property an neih belh emaw chuan an chawi zat a pung ngei tur a ni. Mahse, AMC-in property tax a khawn mekah erawh a pun dan a mumal lo hle. In sak belh miah lo, khawih danglam miah lote pawh an chhiah a pung tam hle," a ti.

Khawi ramah pawh chhiah pek ṭhin a nih thu sawiin Lallianchhunga chuan, "Ram changkang apiangah chhiah hi a sang mai niin a lang. Amaherawhchu, mipuiin chhiah an pek danah kalphung fel tak a awm ṭhin a, mipui chhiah pek tlingkhawm hman danah pawh mipui thîkthu a chhe hle ṭhin," a ti a; khua leh tui nih angin chhiah pek ṭhin tur a nih thu a sawi.

Dr Lallianchhunga chuan, AMC property tax tihpun dan erawh hriatthiam theih a nih loh thu sawiin, "Sorkar laipuiin AMC puala pawisa a rawn pek te, Pu Zoramthanga kaihhruai MNF sorkarin a hrènsak rei lutuk avangin AMC hian pawisa an nei thlâwt lo a, AMC-a thuneitu MNF-te hian property tax sang tak hmangin mipui an rawk ta mai em ni tih hi kan zawhna a ni," a ti.

MPCC Media hruaitute chuan, AMC sorkar chu property tax a khawn mek, a punna sang lutukte chu a rang thei ang bera en nawn a, assessment ti ṭha leh vek tur leh, dik lo taka tax an lo laksak tawhte chu  e Mizoram Municipalities (Property Tax) Management Rules, 2014, Rule 28(1)-in a sawi angin, a rang thei ang bera pe kîr turin an phût tih an sawi.

Property tax chungchanga lungawi lohna neite'n an lungawi lohna an thlenna tur AMC-in a la din loh thu sawiin MPCC Media hruaitute chuan, "Municipal Appellate Tribunal pawh danin a phût ang ngeia a rang thei ang bera din turin AMC sorkar kan phût a ni," an ti.