Kan khingpuite enin, kan sorkar leh ngei dawn - MNF Vice President

MNF vice president Vanlalzawma chuan nimin khan Mizo Hnam Runa inkhawmah thu sawiin, political party-a an khingpuite enin, MNF an sorkar leh ngei dawn thu a sawi.

Vanlalzawma chuan, tunlaiin politics ngaihven, a taka inhmang lote aṭangin MNF an sorkar leh ang em, tih zawhna a tam thu sawiin, "Kan khingpui turte han en hian kan sorkar leh ngei ang, tih hi ka chhanna a ni.

A chhan chu, ZPM-ah beisei tur tak tak an la awm lo a, Congress ni se an tê tual tual a, BJP phei chu el tham an la awm lo," a ti.

MNF Vice President chuan, tunlaiah social media khawih thei turin phone changkang tak tak miin an hûm fur tawh tih sawiin, "Social media-ah hian thu thar engkim mai kan hmu thei tawh a, chuvangin, kan hman ṭangkai thiam a ṭul a, tute emaw va beih kher kha a ngai lo," a ti a; beng tivar turin tunlai mila an awm ve a ngaih thu a sawi a ni.