Quarry chimin mi 15 vel a chhilh

Nimin chawhnu dar 2:40 vel khan Hnahthial leh Lunglei inkar national highway kawngpuia Maudarh, Hnahthial district khaw bulah ABCI company-in lung an lâkna quarry a chim a, mi 15 vel leh khawl eng emaw zat a chhilha hriat a ni. He thu ziah lai hian leiminin a chim hnante zawn mek a ni.

Leichimnaa hmuna kal Hnahthial District MJA member Rodingluaia hnen aṭanga Vanglaini thu dawn danin, Maudarh bula national highway laih zauh hna thawktu ABCI chuan Maudarh aṭanga km. 2 vela hlaah lung an la ṭhin a ni.

Lung lâkna hmun chhak lam chu nimin chawhnu dar 2:40 vel khan a chim a, hna thawhna atana hman Hitachi excavator panga, drilling machine pakhat, crusher pakhat leh khawlte enkawltu mi 15 vel a chim hnan a ni. He thu buatsaih lai hian leiminin a chhilhte lak chhuah tuma beih mek a ni a; mihring thi leh hliam zat hriat theih a la ni lo. Thil thleng hriat a nih veleh

Hnahthial DC offi ce aṭangin SDC pahnih Dr Lalramdintluanga leh Betty Lalrinfeli te an kal nghal a, buaipui ṭulte an buaipui. Hnahthial police, Maudarh leh Leite khawtlang hruaitute leh Hnahthial YMA hruaitute pawh vanduaina thlenna hmunah an kal nghal a; khawl hmangin chhanchhuah hna leh ruang lak chhuah hna ngawrh taka thawh a ni a, he thu ziah lai thleng hian mihring lak chhuah a la awm lo a ni.