MNF returnee-te tana Maumuala in hmun ngaihtuahtute Minister hoin an ṭhukhawm

Aizawl dái, Maumual (Chaltlang ram)-a MNF returnee-te tana in ngaihtuahsak tura din Development Committee for MNF Returnees at Maumual chu nimin khan an chairman Lalruatkima, Land Revenue & Settlement minister hoin a pisaah an ṭhukhawm. LRS directorate-in House Site Plan an siam chu an pawm a, tun thla (November) chhungin Maumual ram ṭheh zawh tum a nih thu LRS hotute'n an sawi.

Ṭhutkhawmah hian, kum 1987-a Maumual rama House Site Plan leh LRS department-in zirchianna a neih hnua House Site Plan/Project an siamte an thlirho a ni a; ruahmanna ang chuan, in tin chu kawngin a pawh vek dawn a, vantlang hmun tur hrang hrang ruahman tel a ni. LRS department chuan tun November thla chhungin Maumual ram ṭheh zawh an tum a, ṭheh zawh a nih veleh PWD leh Disaster Management & Rehabilitation-te'n detailed project report an siam ang.

Meeting-a tarlan danin, Maumual ramah hian ram nei inhriattir mi 751 an awm a, chu'ngte chu LSC 722, house pass 16, VC pass pasarih, WRC pahnih, garden pass pakhat leh a dang pathum a ni. Report lut aṭanga House-Site Plan chhunga awm hriat mai theih chu 409 a ni a, additional plan chhunga mi hriat theih 17 a ni. Plan chhunga mi a nih leh nih loh hriat theih loh 325 an awm bawk.