Minister Thangtea'n central hotute a hmu

Minister Dr R Lalthangliana chuan nimin khan New Delhi-ah a department enkawl kaihhnawiha sorkar laipui hotute a kâwm a, hmalakna leh hmachhawp hrang hrang a sawipui.

Dr R Lalthangliana hian Human Resource Development leh External Affairs changtu minister of state Dr Ranjan Singh chu a chenna inah a kâwm a, Mizoram University Southern Campus din tur thu January 2020-a Ministry of HRD-in notifi cation a tihchhuah tawh, MZU pawhin DPR an thehluh tawhah hmasawnna a la awm loh thu a hrilh a, tun kar chhung ngeia chinfelpui turin a ngen.

Mizorama district ṭhenkhat, Kendriya Vidyalaya Sangathan (KVS) la awm lohnaah ram hmuh theih a nih chuan KVS din turin Dr Ranjan Singh a ngen a; Dr Ranjan chuan, hmun a awm thei a nih chuan DPR siama thehlut rang tur leh hma a lo lak tur thu a lo hrilh niin sorkar thuchhuahin a tarlang.

Ministry of Micro, Small & Medium Enterprises (MSMEs) secretary BB Swain leh offi cial pawimawhte nen an inkawmnaah R Lalthangliana chuan, Mizorama industry-te tihchangtlunna tur DPR an siamte a bawhzui thu a hrilh. 

Sorkar laipui hotute chuan, fl atted factory complex pali - IGC Luangmual (cheng vbc 9.98), Industrial Estate, Kolasib (cheng vbc 14.99), IIDC, Lunglei Pukpui (vbc 9.98) leh IIDC Champhai Zote (vbc 9.93) tihhlawhtlinna tur DPR-te chu rei lo têah an tihfel theih dawn tawh thu an lo hrilh.

Dr R Lalthangliana chuan, Union Health secretary Dr Rajesh Bhushan hnenah Zoram Medical College tihhmasawnna tur DPR thehluh tawh chungchang te, JICA project Cancer superspeciality Hospital sakna tur sum ennawn a nih hnua cheng vbc. 200 dang pek chhuahna tur NoCMinistry of HFW-in an pek ngai chu rang taka tih a ṭul thute a thlen a; Dr Rajesh chuan an lo bawhzui nghal tur thu a sawi. 

Dr R Lalthangliana hian NITI Aayog member (Health) Dr VK Paul hnenah Mizorama CHC leh PHC zawng zawng tihchangtlun chungchang te, NHM sum second instalment táng mek nuai 3,300 chungchangte a thlen bawk.