MPYCC-in pute tlawn nana thuchhuah siam tawh lo turin MNYF-te chah

Mizoram Pradesh Youth Congress Committee chuan thuchhuah siamin, MNF ṭhalaite'n Mizoram hmasawnna thlentua Zoramthanga an ngai chu thu dik lo a nih thu an tarlang a; an pute tlawn nan maia thuchhuah siam tawh lo tur leh thu belhchian dâwl chauh chhuah ṭhin tawh turin an chah.

MPYCC chuan, tun hnaia Ministry of Road Transport & Highways-in hmarchhak statete tana kawngpui thar sialna tur project a duanah Mizoram tana sum a dah cheng vbc. 6,664 chu MNF ṭhalaite'n Zoramthanga hmalakna vang nia an sawi chu nuihzatthlak an tih thu an tarlang a, "Pu Zoramthanga hmalakna a nih chuan, state dang Arunachal Pradesh-in vbc. 44,000, Assam-in vbc. 38,000, Manipur-in vbc. 15,499, Meghalaya-in vbc. 12,500, Tripurain vbc. 12,426-te an hmu a, Mizoram CM hian heng state CM-te hi a tluk lo hle tihna a ni," an ti.

Congress ṭhalaite chuan, Mizoram hmasawnna ruhrel lian leh pawimawh, tuna ramin innghahna atana a hman mekte chu Congress sorkar kutchhuak deuh vek a nia sawiin, hmasawnna ruhrel hrang hrang din a nih dan zir chiang hmasa turin MNF ṭhalaite an chah.

MPYCC tarlan danin, Tuirial HEP chu thluaka sum lutte avanga hluihlâwn a nih tawh hnuah Congress sorkarin a din thar leh a, ṭangkai takin mipuite'n an hmang mek. Damdawi-in lian leh doctor zirna, research hial zirna tur khawp Falkawna mi chu Zoramthanga kaihhruai sorkarin ar vulhna tâwk lekah sum âtchilhna avangin a chhuah a, Congress sorkarin medical college leh damdawi-in lian changtlung takah a din chho leh a ni.