Chaltlanga Tourist Lodge Annex hawn a ni

Chaltlanga Tourist Lodge sak zawmna, Annex Building thar chu nimin khan Tourism minister Robert Romawia Roytein a hawng. Cheng nuai 487.45 hmanga sak a ni.

Tourist Lodge Annex building sakna atan Ministry of Tourism (NE Section) aṭangin sum hman a ni a, project hming chu Destination Development Scheme in the State of Mizoram tih a ni. Teh kualin metre 2462.28 bial a ṭhut a, chhâwng li a ni a; type-1 quarters paruk, mi 280 lenna conference room, mi 75 lenna board room, lounge, VIP suite pali, riahna pindan 16, a awm.

Robert Romawia Royte chuan, Tourism department-in hma a sawn nasat thu sawiin, "Sorkar laipuiin Responsible Tourism leh Sustainable Tourism a kalpui mek behchhanin Mizoram pawhin Mizoram Responsible Tourism Policy 2020 a kalpui mek. Tourism department-a officer leh thawktute inpekna leh thawhrimna zarah department chhuanawm tak a ni mek zel," a ti.

Tourism Minister chuan, Mizorama tourist lodge-te chu mipuiin thlen nan hmang fo se a duh thu sawiin, mipui leh sorkar sum tuakna a ni tih hriaa tourist lodge-te hmang uar lehzual turin mipui a chah.

Tourist Lodge Annex hawnna inkhawm hi Tour ism director Saitluanga’n a kaihruai a, Tourism Development Board vice chairman TC Pachhunga leh Tourism secretary Manisha Saxena te khualzahawm an ni.