Mizoram police-te ralthuam hlan an ni

Nimin khan Police headquarters-a GS Arya Mess-ah Mizoram Firearms Bureau-te chuan Mizoram Police hnenah ralthuam chi hrang hrang an hlan a, Home minister Lalchamliana'n a hmanpui.

Mizoram Firearms Bureau hian Mizoram Police hnenah AK Type 56 Rifle, AK Type 81 Rifl e, M4 A1 Carbine, MA3 MK-II Rifl e, MA3 MK-II Rifl e leh ralthuam chi dang, a vaiin 49 an pe a ni.

Home Minister chuan, Mizoram police-te'n a theih chin chinah ralthuam ṭha ber ber leh tunlai ber ber nei se tih chu sorkar duhthusam a nih thu a sawi a, "Amaherawhchu, sum leh pai lamah duh khawp kan neih ṭhin loh avangin duhthusam ang zãnin ralthuam kan lei thei lo.

Chuti chung chung chuan ralthuam thar ber berte sorkarin a lei ve reng a, kan police-te ralthuam neih hi a zahpuiawm loh hle a ni," a ti. Krismas leh kum thar a thleng dawn hnai tih sawiin Lalchamliana chuan, "Heng hunah hian silai lem, a mu nei chi, hâlpuah leh hâlmawikhap a ni tih hre nawn ang u," a ti a; Krismas thleng turah sumdawngte chu hâlpuah, hâlmawi leh silai lem a mû nei zuar lo turin a chah a ni.