Huamhauh deuh chu ni ila inhmun Pahnih/pathum ka nei ang - Hawla

Chief Minister Lal Thanhawla chuan mi huamhauh chu ni sela, Kolkata-ah inhmun pahnih/pathum a neih tur thu a sawi. Hetihlai hian, false affidavit thehluta Lal Thanhawla puhtu, Lalhriatrenga Chhangte chuan a complaint thehluh chu Election Commission of India (ECI)-in an dawng tih an hriattir tawh thu Vanglaini a hrilh.

Nimin khan Congress Bhavan-ah thu sawiin Lal Thanhawla chuan, Kolkata sorkarin an mi duhsak leh zah zawngte inhmun an peknaah inhmun a nei chu lawm turin an party mite a chah a, "In hmun ka nei mai a ni lo, ka recommend-te chuan an hmu zel a ni. Mi huamhauh deuh chu ni ila in hmun pahnih pathum ka nei ang. Hetiang hmunah hian midang inhmun pe ve se chu ka chhuang khawp ang," a ti.

Chief Minister chuan Bangalore-ah Mizoram House atan ram a dil a, ṭha tak an pek thu sawiin, "Kei pawh ka duh leh duh loh min zawt a, ka duh dawn leh dawn loh ka la ngaihtuah ang," a ti a, Pune-ah pawh an Chief Minister-in ram a offer a, a duh dawn leh dawn loh a la sawi theih loh thu a sawi.

Assembly Session-a Chief Minister kal tur dal chu misual berte hna a nih thu sawiin CM Hawla chuan, "Eng hnathawk pawh nise Assembly Session-a kal tur dan hi a thiang lo. Dan tam tak bawhchhiatna a ni," a ti.

Lal Thanhawla chuan Assembly Session-a a kal tur dan a nih chungchangah member-te'n privilege motion pu lut duh se chuan MNF Ṭhalai thil tih a nih phei chuan tang tur an awm tur thu sawiin, "Mahse kan hotute hi phuba la chi an ni lo," a ti a, MNF-te chu action la theitu Election Commission of India (ECI) an ni lo tih inhria se a duh thu a sawi.

ECI-a amah hektu Lalhriatrenga Chhangte chuan Mizoramah deputation-a thawh a dil tawh thu sawiin Lal Thanhawla chuan, "A lehkha pakhat phei chu ṭhianṭha lehkha ang hi a ni a, chutiang ti thei tur pawh chu a ni. Mahse Geology & Minining dept.-a thawkte ka rawn a, an hlau vek. Mithiam tak a ni maithei, mi rilru ṭha tak chu a nih ka ring lo," a ti.

Vanglaini palai zawhna chhangin Lal­hriatrenga Chhangte chuan false affidavit chungchanga chief minister Lal Thanhawla a heknaah ECI chuan a complaint thehluh chu an hmuh tawh thu an hrilh tawh niin a sawi.

Lalhriatrenga Chhangte chuan Lal Thanhawla'n Kolkata-a a ram hi a hminga dah turin August 30, 2013 ah a buaipui thu sawiin, "Hemi ni vek hian tihfel nghal a ni. Tihfelna document an dawn hun tak erawh September 2, 2013 ah a ni. A hmingin a lo dah khera a pawi a ni, ni lo se chuan ka tan pawh buaipui a ṭulna kher a awm lo," a ti.

Lal Thanhawla a huat avanga ECI-ah hian complaint thehlut a nih loh thu sawiin Lalhriatrenga Chhangte chuan, "Pu Hawla hi a mimalin ka bei lo a, kan ram hruaitute'n dawt leh eiru paha min hruai hi kan ning tawh. Rambuai lai angin min hruai tawh suh se, mipuite hi kan fing ve tawh tih hi hria se ka duh," a ti a, eng party mi pawh dik loa a hriat chu a umzui tur thu a sawi.

Lalhriatrenga Chhangte sawi danin, false affidavit chungchangah hian ukil C Lalramzauva chuan Lal Thanhawla hi Court-ah a khing dawn a ni.