NHM sum tur pek chhuah thuai phut

ZNP Ṭhalaite chuan nimin khan an pisa-ah thuthar thehdarhtute kawmin, National Health Mission (NHM) aṭanga fund lokalte chu Mizoram State Health Society (MSHS) hnena pe chhuak thuai turin Mizoram sorkar an phut.

ZNP Ṭhalai president Lalmuanpuia Punte chuan NHM hnuaiah Mizo ṭhalai lehkhathiam engemawzatin hna thawkin, chhungkaw chawmna atana an hman thu sawiin, "June 2017 aṭanga vawiin ni thleng (thla 5 zet) chu hlawh la thei loin kan sorkar chak tak hnuaiah hian an awm mek a, an lainatawm tak zet a ni," a ti.

NHM hnuaia hna­thawkte hlawh leh inrelbawlna tur sum hi Ministry of Health & Family Welfare-in cheng vbc. 2,027.20 chu September 14, 2017 khan an rawn release tawh tih sawiin Lalmuanpuia Punte chuan, "Hei hi tun financial year (2017-2018) atana 1st installment niin a project cost aṭanga 75% a ni," a ti a, installment lokal hi Mizoram sorkar hian a bawhzui chak loin a ngaihthah tih a lan chian thu a sawi.

ZNP Ṭhalai President sawi danin, tuna India sorkar kalphung ang chuan state sorkarin a dawn aṭanga ni 15 chhunga a neitu/dawngtu tur (concerned department) dik tak hnena pek chhuah leh tur niin, he mi hun chhunga pekchhuah a nih loh chuan sorkarin a pung nen a pek vek a ngai a ni.

He NHM pawisa, September thla daiha sanction tawh ni si, MSHS in tun thlenga an la dawn lohna chhan hi ZNP Ṭhalai chuan Mizoram sorkar an zawt a ni.

NHM sum ringa MSHS hnuaia thawkte hi tun dinhmunah mi 2130 an ni a, thla khata an hlawh chu cheng vbc. 3 a ni. An mawhphurhna a lian em em a, an tel lo hian Mizoram hian hriselna kawngah harsatna lian tak tawkin, mihring nunna chan mawlh mawlh theih a ni. An hnathawh a pawimawh avang hian ngaih pawimawh an ṭul a, duat an phu a ni.

Congress sorkar hian an flagship programme, NLUP/NEDP (aiawt policy) chak taka an kalpui theihna atan pawisa an sem reng thei tih sawiin Lalmuanpuia Punte chuan, "Heng an pawisa semte hi he NHM sum hi a lo ni reng lo maw tih hi ZNP Thalai chuan Mizoram sorkar kan zawt a, a rang thei ang bera he NHM sum hi MSHS hnena pe vat turin kan phut a ni," an ti.