Ramngaw humhalh dan tur sawiho

Aizawl District Level Committee on Afforestation and Conservation chu nimin khan a vawikhatna atan Aizawl DC conference hall-ah an ṭhukhawm a, hmalakna tur tlangpui an sawiho.

Meeting kaihruaitu, DC charge la mektu, addl. DC John LT Sanga chuan committee nihphung tlangpui sawifiahin, "NLUP hmalakna peng pakhat, Mizoram chhunga ramngaw leh nungchate humhalhna tihhlawhtlinna atana hmalatu Mizoram Environment & Forest Consultative Forum (MEFCOF) ngenna anga District Level Committee on Afforestation and Conservation hi din a ni," a ti.

MEFCOF vice president Rev. Dr. F Sangkhuma chuan MEFCOF nihphung leh hmalak tawh dante sawifiahin, "Mizorama ramngaw leh nungchate humhalhna lama hma la turin kum 2004 aṭangin Mizoram Consultative Forum tih hmingpua hma lak a ni," a ti a, kum 2015-a Mizoram sorkar­in NLUP Implementing Agency pakhat atana a hman aṭangin an pawl hming chu Mizoram Environment & Forest Consultative Forum (MEFCOF) ti a thlak a nih thu a sawi.

Meeting-ah hian hmalakna atana ṭha tura an hriatte an sawiho a, Aizawl district chhungah theih ang angin ramngaw leh nungcha humhalh pawimawhna awareness programme kalpui an rel a, Aizawl district huam chhung khaw tinten 'Zo Theihuan' nei tura hma lo la turin sorkarin hriattirna min chhuahsak se, an ti.

Aizawl District Committee on Afforestation and Conservation-ah hian Aizawl DC chu chairman niin, DFO Aizawl chu member mecretary a ni. Member-te chu LRS dept., LAD, PHE, Agriculture, Horticulture, Soil & WC dept., MEFCOF, Central YMA, MHIP, MUP leh MJA aiawhte an ni.