Chak zawka hri danna pek dan tur sawiho

Mamit District Task Force on Immunization chu nimin khan an chairman, DC Lalbiaksangi hoin DC conference hall-ah an ṭhukhawm a, hri danna chak zawka pek a nih theih dan tur an sawiho.

Meeting-ah hian district immunization officer (DIO) Dr.TC Hming­thangi chuan an district chhunga hri danna an pekchhuah tawh dan chungchang leh an pek leh dan tur bakah an hlawhtlinna hmuh tawh dan a sawifiah a ni.

Measles Rubella (MR) Campaign chungchangah WHO consultant Dr. Shrikant Supekar chuan hmalak dan tur hrang hrang leh kalpui dan tur a lem nen a sawifiah.

Measles Rubella hi January Ni 18, 2018 aṭangin naupang thla 9 mi leh kum 15 inkarte pek vek tura ruahman niin, karkhatnaah zirna-in hrang hrangah pekchhuah tura ruahman a ni a, a karhnihnaah sub centre leh anganwadi-ah, a kar thumnaah mobile team-in hri danna hi an sem kual leh anga, a kar lina-ah tih hmaih palh awm theite vai kualin sweeping activity neih leh tura rua­hman a ni.

Meeting-ah hian hri danna chak zawk leh ṭha taka kalpui anih theih nan hri danna pek inzirtirna chu Bru ṭawng leh Chakma ṭawnga lehlin tura meeting hmasain a lo rel tawh chu peihfel tawh a nih thu tarlan a ni.