MFASA-in khawmpui an hmang

Mizoram Finance & Accounts Service Association (MFASA) chuan nimin khan Tourist Lodge, Chaltlangah khawmpui an hmang a, minister KS Thanga'n a hmanpui.

KS Thanga chuan MFASA member-te chu Mizoram sum vawngtu, mawhphurhna pawimawh tak nei an nih thu sawiin, "Mipui rawngbawltu in nih angin office-a nangmahni rawn dawrtute pawh tha taka dawngsawng a,ṭtanpui theihna apianga ṭanpui zel tum ang che u," a ti a, sorkar hna eng pawh thawk ila, thawktu ṭha ni tur chuan mahni invawnna, discipline ṭha tak neih a pawimawh thu a sawi.

Officer kalkhawmte chu an hna chelh theuh ah invawng tak chungin inpekna tak tak nen thawk ṭhin turin a chah a KS Thanga chuan, "Mahni hna kaihhnawih thilah phei chuan kum tam leh tam loh, thawh rei leh rei loh sawi loin thiamna leh hriatna tipung zel a, in ‘update’ zel tur a ni," a ti.

Khawmpui hi MFASA vice president Van­lalsawma'n kaihruaiin, member thar 11 lawmluhna hun hman a nih bakah, an member nunna chan pakhat an sun a ni.

Mizoram Finance & Accounts Service Association-ah hian member 76 an awm mek a, kum 2016-2017 chhungin an member mi 18 kaisangin, mi pariat superannuation pension-a chhuak an awm a ni.