KHAWTHLIR

ATC Day
Aizawl Theological College (ATC) chuan nimin khan an college campus-ah an college day vawi 52-na an hmang. Day lawmna hi Synod moderator Rev. Lalzuithanga'n kaihruaiin, principal Rev. prof. C Lalhlira'n inlawmna thu a sawi a, speaker atana sawm Bishop's College, Kolkata-a principal Rev. Dr. Sunil M Caleb chuan 'Challenges in Christian Ministry' tih thupuia hmangin thu a sawi a ni. ATC hi kum 1907 a din a ni.

Delhi-ah Larsap
Ni hnih awh Northeast Business Summit chu Ningani khan Hotel Lalit, New Delhi-ah a hawnna neih a ni a, governor Lt. Gen. Nirbhay Sharma pawh a tel. Summit hawnnaah hian DoNER minister Jitendra Singh chuan‘Northeast Business Manual’ a tlangzarh a ni.

Thisen pe
Phulpui Branch KṬP chuan nimin khan an sunday school hall-ah Aizawl Civil Hospital tan thisen unit 35 an pe. ṬKP Shalom Unit, Mission Vengthlang pawhin Aizawl Civil Hospital tan thisen unit 15 nimin vek khan an pe a, AIR Lunglei staff-te pawhin Lunglei AIR kum 20 tlin lawmna atan Lunglei Civil Hospital tan nimin khan thisen unit 10 an pe a ni.

Jubilee lawm
Govt. Edenthar Middle School chuan nimin khan an kum 25 (Silver Jubilee) tlin an lawm a, an hun hmanpuitu bial­tu MLA Lal Thanzara chuan zirtirtute chu an thlen china duhtawk mai loa tun aia nasa lehzuala ṭan la a, ram leh hnam tana mi chhuanawm chher chhuak zel turin a fuih. Govt. Edenthar Middle School hi kum 1992 a din niin, tun dinhmunah zirtirtu 10 leh zirlai 74 an awm a ni.

Quiz zo fel
Election Commission of India bultuma Siaha district-a zirlaite tana election chungchanga quiz competition buatsaih chu nimin khan DC conference hall-ah zawh­fel a ni. Quiz hmanga inelnaah hian Siaha district chhunga sikul pariat an tel a, Don Bosco High School pakhatna an ni a, Siaha High School chu pahnihna niin, Tisi High School leh Siaha Govt. High School chu pathumna an ni.