AMC-in tender loin contract 970 an pe ; Vantlang tan ni lo mimal ramah hna 10 an thawk

Aizawl Municipal Corporation (AMC) chuan kum 2015-2016 chhung khan dan bawhchhiain tender chhuah loin contract hna 970 an pe. Vantlang tana pawimawhna nei lo mimal ramah hna 10 an thawk.

Assembly Session neih zawh taka Finance Minister-in a tlangzarh, Comptroller and Auditor General (CAG) report, 'Annual Technical Inspection on Report on Rural Local Bodies and Urban Local Body for the Year Ended 31 March 2016'a tarlan a nih dan chuan, AMC hian kum 2015-2016 chhung khan contract hna 1,270 a pe chhuak a, a vai hian cheng vbc. 16.96 man a ni.

Central PWD Works Manual-ah chuan contrct hna Rs. 50,000 aia tamte chu hmanhmawhthlak leh ṭul bik thil a nih loh chuan tender chhuaha a thawktu tur thlan tur a ni. AMC-in kum 20015-2016 chhunga contract hna an pek chhuah 1,270 zinga 970 chu Rs. 50,000 man aia sang an ni a, a vaiin cheng vbc. 16 man a ni. Heng hna 970 te hi hmanhmawhthlak a awm lo.

CAG chuan, tun hnua AMC hnuaia hnathawh tur reng reng, Rs. 50,000 man aia tam chu tender hmang chauha contractor hnena pek ṭha a tih thu leh hnathawh reng reng chu uluk zawka vil ṭha a tih thu report-ah hian a tarlang a ni.

Hetihlai hian Mizoram sorkar chuan AMC pawisa tur cheng nuai 18.7 an ba mek a ni. Pawisa an bat hi kum 2016-2017 atana AMC-in General Basic Grant (GBG) cheng nuai 798.50 leh General Perfomance Grant (GPG) cheng nuai 471 a hun taka an pek hman loh avanga penal interest an chawi tur a ni.

AMC hian kum 2012-2017 chhungin GBG ah cheng nuai 7002.60 leh GPG ah cheng nuai 3665.05 an hmu tawh. Hemi hun chhung vek hian a hun taka AMC hnena pawisa an pek loh avangin Mizoram sorkar chuan penal ineterest-ah cheng nuai 157.67 a chawi tawh a ni.

CAG-in AMC hna an endikna:
1) Cheng nuai 7.55 man hna 10 chu mimal rama thawh a ni a, vantlang tana pawimawhna a awm lo.
2) Hna panga cheng nuai 5.15 man chu hnathawhna hmun zawn hmuh theih a nih loh avangin thawh a nih ngei leh ngei loh hriat theih a ni lo.
3) Hna pali cheng nuai 9.80 man chu a lema bill lak chhuah nia hriat a ni. Hnathawha an sawi leh bill-a hnathawh tur tarlan a inmil lo.
4) Cheng nuai 10.01 man hna pasarihah chuan bill leh measurement books-a thawh tura tih aia tlem thawh a ni.