IITF-ah Mizoram State Day hman a ni

Indian International Trade Fair (IITF) Pragati Maidan, New Delhi-a neih mekah Inrinni tlai khan Mizoram State Day hman a ni a, Commerce & Industries minister H Rohluna'n a hman pui.

H Rohluna chuan Mizoram chu hmarchhak kila awm a nih avangin India ram pum aṭanga thlirin a lang pha lo fo tih sawiin, "Vawiina Mizoram Day hman chhan pawh hi tianga state biru pholanna tur leh Mizoram hi a awm a ni tih tarlanna tura rua­hman a ni. Vawiinah hian Mizo hnam zia rang, nihna leh dinhmun phochhuah kan tum ang," a ti.

Industries Minister chuan Zoram chhungah pawn lam aṭanga thilsiamna din tura mi hip nan leh khualzin tam zawkin Zoram an rawn tlawh theihna atan day hi hman ṭangkai tum a nih thu sawiin, Mizoram stall-te tlawh turin mipuite a sawm a ni.

Day hmanaah hian Lok Sabha MP CL Ruala, minister John Rotluangliana leh MLA Joseph Lalhimpuia te pawh an tel a, zaithiam hrang hrang zai ngaihthlak tur a awm bakah, Mizo thil siam chhuahte model-te'n an entir a ni.

November 14-a neih ṭan IITF hi president Ram Nath Kovind-in a hawng a, Mizoram aṭangin mi 11 in an thil siam chhuahte stall 11 ah an pho chhuah bakah, Saras Fair hnuaiah RD dept.-in tirhin stall pakhat hawn a ni a, mipuiin an hlut hle.