MZP-in ILP nei lo 150 an hmu chhuak ; Thuneitute kutah an hlan nghal

MZP bultumin Inrinni khan Mizoram hmun hrang hrangah hnam dang dan loa khawsa (ILP nei lo) dap chhuah runpui neih a ni. ILP nei lo mi 150 chuang leh dan loa sumdawng 20 chuang hmu chhuakin, thuneitute kutah an hlan.

MZP chuan thuchhuah siamin, sorkar leh thuneitute pawhin theih tawp chhuaha hma an lak mek lai a, vawi khat hnatlanna a hnam dang permit nei loa khawsa leh dan loa sumdawng ṭhahnem tak man chhuah tur an awm chu pawi an tih thu tarlangin, "Heng hnam dang dan loa khawsate hi permit nei lo bakah anmahni leh anmahni loin sponsor-te leh hnamdang vekin an lo sponsor-te an ni hlawm a ni," an ti.

Hnam dang ILP nei lo a dap­chhuah kawngah dan loa Mizorama awm Mizo vekin an thlavang an lo hauh ṭhin chu pawi an tih thu tarlangin MZP chuan hnamdang ILP nei lote chu an thlavang lo hauh tawh lo turin Mizo mipuite an ngen.

MZP chuan India danpui-in a bik taka min humhalhna dan ILP hi a nihna ang taka hmang tur leh a pekchhuah dan chungchangah pawh fimkhur leh zuala kalpui turin thuneitute ngenin, "Hnam dang dan loa khawsa kak hmuhchhuahte chungchang hi ngun takin kak enzui dawn a, thawn kir (push back) an nih dan pawh Vairengte thleng kan umzui ang," an ti.

Mizoram chhung a dan loa hnamdang awmILP nei lo te, hnamdang sumdawngte leh Mizo hming hawh a sumdawngte dapchhuakin a ṭul angin hma a la chhunzawm zel dawn tih sawiin MZP chuan, "Hnam dang dan loa sumdawngte dapchhuah kawngah Mizo mipuite thlawpna kan ngen a ni," an ti a, dan loa hnam dang sumdawngte hi an sumdawnna tihtawp a nih theih nan hmalak zel an tum thu an sawi.