Tual phiah fai ni atan Inrinni hmang dawn

Khawpui fai inelna Swachh Survekshan-2018 hnuaia hmalak zelna tur bawhzuiin, Serchhip District Sanitation Task Force chu tun hnai khan DC Sangchhin Chinzah hoin DC conference hall-ah an ṭhukhawm a, Inrinni tin tual phiah fai ni atana hman an rel.

Serchhip DUDO Vanthangpuii chuan Swachh Survekshan chungchang sawi fiahin, "Swachh Survekshan hian khawtlang leh mipui faina lama hma kan sawn zel theihna turin tehfung hrang hrang a nei a, tun dinhmunah hian India rama khaw 4041 huamin, Mizoram bikah chuan census town 23 te a huam tel a ni," a ti.

Meeting-ah hian Swachh Survekshan-2018 lo hmachhawn tura tehfung hrang hrangte zir ho leh sawi ho a ni a, khawtlang, mipui leh sorkar department hrang hrangte faina lama hma kan lak theihna tur kawng hrang hrang inhrilh hriatna leh hma lak zel dan tur ngaihtuah a ni.

District Sanitation Task Force thutlukna angin, Serchhip khaw chhunga chhungkaw tinah sanitation fee, thla tin Rs. 10 ṭheuh khawn a nidawn. Zirna in hrang hrang, kohhran hrang hrang, YMA leh Village Council tinah Sanitation Committee din tur a ni a, an kaihhruaina hnuaiah Inrinni tin chu ‘Tual phiah fai ni’ atan hmangin, mahni kawt leh a chhehvelte phiah fai ziah ṭhin nise tih a ni.

Meeting-ah hian department hrang hrang hotute, Serchhip MJA aiawhte, Village Council hrang hrang aiawhte leh YMA aiawhte an tel a ni.