Kawng siam hna thawk mek

PWD hnuaia Aizawl Road South Division leh Aizawl Road North Division chuan tunhnai aṭang khan khan Aizawl khawpui chhung kawng hrang hrang siamṭhat hna an thawk.

Aizawl Road South Division chuan khawpui chhung kawng an siam rual hian Hualngohmun leh Samtlang inkar kawng thar, km. 4.85-a thui an lai mek a, Inrinni thleng khan km. 2 chuang an lai tawh. He kawng siam nan hian NABARD sum, cheng vbc 17 leh nuai 40 ruahman a ni.

Aizawl Road North Division chuan Maubawk-Lawipu kawng te, Kulikawn leh Hridaikawn inkar kawng te, Raj Bhavan chhim Gate bul aṭanga Sikulpuikawna chhuak, Tuikhuahtlang kawngte leh Bungkawna Johnson College panna kawng siamṭhat hna an thawk mek a ni. Tunkarah Khatla kawn aṭanga Nursery Veng leh Bungkawn kaltlanga Khatla kawna chhuak kawng siamṭhat an tum a ni.

Aizawl Road North Division hian Dawrpui pheia kawng ṭha laia tui luh lohna tur leh hun rei zawk hman theiha a awm reng theihna turin November 17 aṭang khan Bungkawn aṭangin seal coating an ti ṭan a, nimin khan an chhunzawm a ni.