Vawiin aṭangin tiam chin awm loin Hachhekah total bandh kalpui dawn : Hachhek biala CM hun hman tur ṭhulh phah a ni

Hachhek Bial Kuhva Chingtu Pawl (HBKCP) leh Jampui Mizo Convention, Tripura (JMC) chuan vawiin November 16, 2022 zing dar 6 aṭang hian tiam chin awm loin total bandh kalpui an tum.

Hei vang hian Hachhek bial chhunga Kawrthah leh Tuidam khuaa chief minister Zoramthanga'n vawiina khelmual a hawn tur chu ṭhulh a ni. HBKCP leh JMC, Tripura huaihawta November 14, 2022-a Kawrthah YMA Rúna kuhva chíngtute general body meeting chuan, "Thu lawmawm kan hriat hma loh chuan joint meeting-in thu a lo dah tawh angin, November 16, 2022 (Nilaini) zing dar 6 aṭangin thu leh awm hma chuan total bandh neih ni se," an ti a ni.

Total bandh an kalpui tur chu kuhva chíngtute hmakhua ngaih vanga ti an ni tih hriatpui turin Hachhek constituency mipui an ngen a; bandh an kalpui tur chu Hachhek MLA Cup khel lai mek pawhin hriatthiampuia thláwp ngei turin an ngen a, an inhriattir bawk.

Total bandh kalpui an tum chungchangah hian Mamit DC leh SP-te chuan nimin khan HBKCP hruaitute an kâwm a, mahse, an beisei ang thu lawmawm an hmuh loh avangin total bandh kaltlangpui an tum a ni.Pawl pahnihte chuan, Mizoram sorkarin dan loa kuhva lak luh a tihtawp duh loh avang leh Mizorama kudam tam tak la awm reng chu Mizoram sorkarin a mit a siai khum tlat avangin Mizorama kuhva chingtute leh Tripura-a kuhva chingtute harsatna a thlen mek tih sawiin, pawi an tih tak zet thu an tarlang.

An thuchhuah tarlan danin, Mizoram sorkar chu Ministry of Home Aff airs thupek zâwm a, dan loa kuhva Mizorama lak luh ṭhin chu titawp thuai tur leh dan phal loh kuhva kudam awm zawng zawng pawh tichhia a, smuggling sumdawnna chu a rang thei ang bera man chhuak turin an phût a ni.

Hetih lai hian, chief minister Zoramthanga leh Sports minister Robert Romawia Royte-te chuan vawiin hian Kawrthah leh Tuidam khelmual hawn programme an nei a; programme hi total bandh an kalpui hnan dawn avangin ṭhulh a ni.

Kawrthah Joint YMA chuan, HBKCP-in total bandh a kalpui tur chu an thláwp a, chuvang chuan vawiina Chief Minister-in an khuaa khelmual a hawn tura chanvo an neihte aṭangin an inhnûkdâwk a; thuchhuah siamin, "HBKCP-in total bandh an huaihawt tur hi kan thláwp tlat. CM programme-a chanvo kan neih turah inthlahrung tak chungin inhnuhdawh mai ni se kan ti," tiin an tarlang.