Maudarh quarry chimah mi pariat ruang hmu tawh

November 14, Thawhṭanni chawhnu dar 2:40 vela Hnahthial leh Lunglei inkar kawnga Maudarh khaw bula ABCI Infrastructures-in lung an lakna quarry chimin a delh zinga mi pariat chu nimin tlai thleng khan lak chhuah a ni tawh a, he thu ziah lai thleng hian ruang dang zawn mek a ni.

Vanglaini thu dawn danin, quarry chimin a delh zat chiah hriat theih a la ni lo a, mi 12 chu a delh ngei tih finfiah a ni tawh. Ruang zawn hna hi NDRF, 2nd Bn. MAP, Assam Rifl es leh BSF mi leh sate'n an thawk a, Hitachi excavator paruk hmangin leivûng hâi a ni bawk.

Thawhṭanni zan khan ruang hmasa ber phawrh a ni a, a pariatna chu nimin zing dar 2:45 khan phawrh a ni. Ruang lak chhuah tawhte zinga mi panga chu West Bengal mi an ni a, pahnih chu Jharkhand mi leh pakhat chu Assam mi a ni. Mi pali chu ABCI hnuaia thawk an ni a, mi pariatchu contractor hnuaia inhlawh an ni thung.

Mitthite dahna turin Leite khawtlangin kuang an siam a, nimin khan Hnahthial District Hospital-ah endik (postmortem) an ni. Ruang endik turin Aizawl leh Lunglei aṭangin doctor an kal a, endik zawh apiangte ruang leh kuang chu Hnahthial Lungleng Branch YMA-in an buaipui zel a ni.

Sorkar thuchhuah tarlan danin, Maudarha quarry chim zau zawng hi square metre 5,000 vel a ni a; chhanchhuah hna thawk turin Mizoram sorkar hnuaiah officer pahnih kaihhruaiin National Disaster Response Force leh State Disaster Response Force mi eng emaw zat an thawk chhuak a, doctor pahnih leh thawktu dang pariat bakah, ambulance pahnih tirh a ni.

Ruang zawngtute'n an mamawh anga an hman atan DMR minister Lalchamliana'n Rs 20,000 a pe a; sorkar thuchhuah chuan, "He chhiatna rapthlak tak thleng hi Mizoram sorkar chuan pawi a ti tak meuh a, ruang zawn hna thawh mek a ni a, hmuh kim an nih hma chu kalpui tur a ni," a ti.