ISPAT anga kum 99 atan ram pe ve turin Industry neitute'n Mizoram sorkar an phût

Mizoram Industry Owner Association (MIOA) hruaitute chuan, Mizoram sorkarin hnam dang company, ISPAT chu kum 99 atan ram a pek thu an sawi a, "Leilung fate pawh kum 99 chhung atan ram min pe ve turin kan phût a ni," an ti.

MIOA hruaitute chuan nimin khan Aizawl Press Club-ah thuthar thehdarhtute an kâwm a; an president F Rodingliana chuan, Mizoramsorkarin kum 2011-ah ISPAT hnenah kum 99 atan ram a pek thu sawiin, "Kum 99 atana ram min pe ve tura kan ngen pawhin Commerce & Industriesdepartment-in min pe ve thei tlat lo. In factory leh hmalakna a tê em mai, tite'n min hnar a ni," a ti a, ram leilung fa aia hnamdang duhsak an ni chu mak an tih thu a sawi.

Kum 10 atan chiah ram pek an nih avangin bank-ah loan an la thei lo tih sawiin Rodingliana chuan, "Kum 99 atan min pe ve se, loan-te lain khawlte kan tichangtlung ang a, siam chhuah lamah pawh a ṭha zawk kan nei thei ang. Chutiang a nih chuan a hlâwkpuitu tur chu Mizo mipui kan ni," a ti.

Mizoram Industry Owner Association hruaitute chuan, industry dinna atana ram an pek, industry din si lote mitmei an vèn avangin kum 99 atana ram an dilna chu sorkarin a pe phal lo nia an ngaih thu sawiin, "Kum nga chhung vel ram pek an awm tawh loh laiin, sorkar phalnaa hma la chu an awm tho," an ti a, industry dinna atana ram pekah chenna-in sakna atana hmangte an awm thu an sawi.

Mizoram Industry Owner Association hruaitute chuan, kum 2020, 2021 leh 2022-ah pawh kum 99 atana ram pe ve tura ngenna sorkarah an thlen thu sawiin, "Kan lo en ang; danin a phal lo, te an ti. Hnam dang zawk chu an pe leh tho si, leilung fa zawk min duhsak kan rin
laiin," an ti.

MIOA hruaitute sawi danin, kum 10 chhung atana ram pek an nih dawnin, cheng sing tél, nuai tél an chawi bakah, kum tin annual fee sáng
tak an chawi. Kum 99 atana ram pek an nih chuan an khawl-in (factory building) leh khawlte'n hlutna a nei ve dawn a, tunah erawh
chuan bank-te mithmuhah hlutna an nei lo a ni.

Property tax chawi tura tih thar an nih thu sawiin MIOA hruaitute chuan, "Property tax pek dawnah sorkarin kan chawi tura an ti leh si hi
hriatthiam har kan ti. Mi ram luah hawh kan nih avangin tun dinhmunah property tax pek rih loh ni se kan ti. Kum 99 atan chuan ram min pe se, property tax pek kan hreh lo," an ti.