Kum tharah chhungkaw 60,000 emaw, a aia tam emaw SEDP pek kan tum - Zoramthanga

Chief minister leh MNF president Zoramthanga chuan, sorkar kum 2022-23 kal mekah SEDP aṭangin ṭanpuina chhungkaw 60,000 hnenahpek mek a nih bakah, sorkar kum tharah chhungkaw 60,000 aia tlem lo an pek leh dawn thu a sawi a; kuhva chungchanga harsatna chu sorkar laipui lam hmalakna a nih thu a sawi bawk.

Zoramthanga hian nimin khan Mizo Hnam Runa inkhawmah thu sawiin, "Financial year kal mekah chhungkaw 60,000 hnenah SEDP Rs 50,000 ṭheuhin sem mek zel a ni a, chhungkaw 600 vel additional pek an ni dawn bawk.

Financial year tharah hian chhungkaw 60,000 emaw, a aia tam emaw pek leh hrâm kan tum dawn," a ti. 

CM Zoramthanga chuan, kuhva chungchangah Assam Chief Minister nen an inbe ṭhin nia sawiin, "Theihtawpin Delhi kan dawr a, Tripura CM
pawh a mang a ang ve hle a ni. Mizoram MP pahnih Pu C Lalrosanga leh Pu K Vanlalvena pawh kuhvaa harsatna sukiang tur hian theihtawpa hma la turin ka ngen a, Delhi lam hi tih tak takin kan dàwr a, kan su mek a, kan sut hlawhtlin thuai ka ring," a ti.

Chief Minister chuan, Vairengte-Kawnpui kawng laiha zangnadawmna chungchanga buaina chu chinfel a ni mek nia sawiin, "Forest lamah buaina a awm tawh lo tura ngaih a ni," a ti a; zangnadawmna hmu turte'n an hmu thuai thei tawh dawn nia sawiin, lawmawm a tih thu a sawi.
MNF President chuan, Covid-19 hripui léng vanga India leh Mizoramin harsatna an tawh chu eptu party-te'n advantageah an hmang nia sawiin, "Hei pawh an pe lo, tihah ringawt an buai a, opposition ho thusawiah hian tui a tling tak tak lo. Min beihna thu hrang hrang hi a dawráwm hlawm hle. MNF-te hi Pathianin kalna kawng mumal tak min siam a, inthlan lo awm leh turah pawh varparh arsi a eng zual zel ang," a ti.