International Tourism Mart 2022-a Tel turin Minister-in mipui a sáwm

Mizoram chuan November 16-20, 2022 chhungin International Tourism Mart 2022 (ITM) a thleng dawn a, vawiin hian Lammualah hawn a ni ang. Tourism minister Robert Romawia Royte chuan, ITM hi chhim ṭheuh turin Mizoram mipui a sáwm.

Tourism Minister hian nimin khan a pisaah thuthar thehdarhtute kâwmin, ITM 2022 chungchang a sawifiah a; ITM chu sorkar laipuia Tourism ministry bultuma neih tur, Mizoram sorkara Tourism department nena ṭang duna buatsaih tur a ni a, sorkar laipuiin cheng nuai 430 vel leh Mizoram sorkarin cheng nuai 200 vel an sên dawn thu a sawi.

Robert Romawia chuan, ITM-ah India ram chhung bakah, ram dang aṭangin tour operator-te an fuan khawm ṭhin thu sawiin, "Kuminaherawh chuan ram pawn lam mite tel tura beisei an ni lo," a ti a; ram dang aṭanga tel an awm an beisei loh chhan zawhna chhangin, tel tur sàwm vel chu Tourism ministry lam chan a nih avangin a chhan chiang taka an hriat theih loh thu a sawi a ni.

Tourism Minister sawi danin, ITM hi kum 2013-ah neih ṭan a ni a, hmarchhak state dangte'n an thleng vek tawh a, Mizoramin a thlen vawi khatna tur a ni. ITM 2022-ah hian hmarchhak state pariat an tel kim dawn a, anni bakah, ram chhung hmun dang aṭangin tour operatorte an tel dawn.

ITM puala Mizoram State Mega Exhibition, Lammuala buatsaih chu vawiin chawhma dar 10:30 hian Commerce & Industries Ministerin a hawng dawn a; Exhibition-ah hian food court stall 26 leh stall dang 76 a awm dawn a, November 19 thleng a awh ang.

International Tourism Mart hi naktuk November 17 zanah Union Tourism minister G Krishna Reddy-a'n R Dengṭhuama Hall-ah a hawng dawn a, DoNER minister of state Ajay Bhatt, chief minister Zoramthanga leh minister dangte an tel dawn. Cultural programme buatsaih a ni bawk ang.

November 18-ah R Dengṭhuama Hall-ah sumdawngte hmaichhana inkawmhona leh sumdawnna lam thil sawihona hun buatsaih a ni dawn a,
hmarchhak state tin aṭangin presentation a awm dawn a, Mizoram aṭangin tour operator, homestay leh hotel neitu leh travel agent 25 an tel dawn a ni.

November 19-ah zing aṭangin ITM pualin Aizawl aṭanga Hmuifangtlang thleng cycle rally neih tur a ni. Chhun lamah ITM hmanga rawn kal mikhualte chu Reiekah hruai an ni dawn a, intihhlimna chi hrang hrang neihpui an ni ang.

Minister Robert Romawia chuan, tourism lamah Mizoramin hma a sawn ve zel tih sawiin, "Tourism lama hmasawn tur chuan mi tinin mawhphurhna kan nei a, mikhual chungah ṭhat kan chhuah tlàn a pawimawh," a ti a; mikhual pakhat tihlungawi lohin nghawng tam tak a neih
rualin, mikhual pakhat tihlungawiin khualzin za a hruai luh theih thu a sawi.

Tourism secretary Manisha Saxena chuan, ITM-a tel turin state pawn lam mi ṭhahnem tak an rawn kal dawn tih sawiin, "ITM hi tourism lama Mizoram hmasawnna thlentu a nih ngei ka ring," a ti.