Kan huat ber tur chu eirûkna a ni - ZLP Deputy Leader

ZPM Legislature Party (ZLP) deputy leader Vanlalhlana chuan, "Hmasawnna hna tiṭhuanawptu kan huat ber tur chu eirûkna a ni," a ti. He thu hi November 14, Thawhṭannia ZPM pisaa inkhawma a sawi a ni.

Vanlalhlana chuan, tun hnaia Thingsulthliaha YMA Rorelah nasa zawka eirûkna do an rél tih sawiin, "Presbytery inkhawmpuiah pawh eirûkna chungchang hi thurel pawimawh tak a ni. Kristian state tan chuan thil duhawm a ni vak lo," a ti a; Mizoram dinhmun enin, ' amna leh bawlhhlawhnate'n tual an léng a pawi ngei e' tih ang a ni ta bera a lan thu a sawi.

ZLP Deputy Leader chuan, eirûkna do turin Lokayukta awm mah se, investigating officer an awm lo tih sawiin, "Chak taka hna thawh theih a ni lo. Sorkar hnathawk zawng zawng an eiru lo a, mi fel tak tak an tam. CM thusawi, IV grade paper hawn leh nuai za tel eiruk a inang lo. Kawng chhia, êng chhia, sikul chhia, sorkar hnathawk leh pension hlawh lak theih lohte hi eirûkna vang a ni," a ti.

Chief minister ni tawhte chungchang sawiin Vanlalhlana chuan, "Pu Ch Chhunga eiruk thu tu ma'n an sawi lo. A huaisenzia, a rilru ṭhatzia, a dikzia, a nun tlàwmzia leh rambuai laia hruaitu nih a tlinzia an sawi ṭhin. Pu Ṭhena eiruk thu tu ma'n an sawi lo, mi rinawm, mi huaisen, mipui thlamuantu a nih thu an sawi," a ti a; Brig. T Sailo chuan CM office a chhuahsanin invawm luhna tur in a neih loh thu a sawi.

Vanlalhlana chuan, Laldenga chu CM a ni rei lo tih sawiin, "Pu Laldenga eirûk sawi hriat a ni lo a, in ṭha tak erawh a nei hman. Pu Lal Thanhawla hi CM ni rei ber a ni a, ram chhunga a eirûkna kan hriat loh laiin, sap chanchinbuah a chhuak uai uai a, PIL thehluh a ni a, a hming a hliau," a ti.

ZLP Deputy Leader chuan, Mizorama CM ni rei ber dawttu chu Zoramthanga a nih thu sawiin, "A hun tìr lamah chuan Zopa, mi inngaitlawm, Pathian ṭih mi niin kan hria. Hun a kal zel a, tuna kan hriat dan erawh a dang ta. A sum lak luh leh thil neih inmil lo thubuai a nei a, ahming a chhe ta hle a ni," a ti a; Zoramthanga chu CM atan an la duh em tiin mipuiah zawhna a siam a ni.