MIMA-in No Vehicle Zone siam loh an duh

Mizoram Merchants Association (MIMA) chuan thuchhuah siamin, hunpui thleng turah sorkar khap - hâlpuah leh puak thei chi reng reng la lut lo tur leh zuar lo turin sumdawng zawng zawng an ngen a; No Vehicle Zone siam loh an duh thu an tarlang.

MIMA chuan, Krismas leh kumthar vuakvêtah lirthei tlan loh ni leh tlan theih lohna hmun 'No Vehicle Zone' siam loh ṭha an tih thu tarlangin, "Nikum khan neih loh a ni a, mipui tan harsatna a awm hran loh avangin neih loh kan duh.

Sorkarin ṭul a ti a, neih tur a nih chuan No Vehicle Zone huam chhungah kawng kamah inzawrh phal loh ni se, sumdawn phalna nei lo, a bikin foreigner tam tak an inzuar ṭhin a, mipui tana kal hleih theih loin a awm tho ṭhin a ni," an ti.