District hrang hrangah Janjatiya Gaurav Diwas hmang

Nimin, November 15 kha India ram zalenna sualtu (tribal freedom fighter) Birsa Munda pian champha hriatrengna leh tribal freedom fighter-te zahna leh chawimawina ní, Janjatiya Gaurav Diwas a ni a; India ram hmun dangte rualin Mizoram district khawpui hrang hrangah hman a ni.

Mizorama a hmanna pui ber Aizawla Chanmari YMA Hall-ah chuan cultural programme anga hman a ni a; Governor Hari Babu Kambhampati chu khuallian niin, Social Welfare & Tribal Affairs minister Dr K Beichhua khualzahawm a ni.

Governor chuan, tribal-te'n India ram zalenna atan an theihna sang tak an lo hlan tawh tih sawiin, "India ram ropuina leh hmasawnna atan an thawh hlâwk em em. India sorkar pawhin tribal-te a dah pawimawhzia chu President atan tribal hmeichhia a ruat aṭang hian a chiang hle a ni," a ti.

Lalnu Ropuiliani chanchin a hriat tawh thu sawiin Larsap chuan, "A huaisenna leh a inpekna a ropui. Mizo lalte leh an khua leh tuite khan Kumpinu sorkar rorelna dodalin an do ṭhin a, kha kha freedom fighter kan tih takte pawhin an hmalak dan a ni," a ti a; Janjatiya Gaurav Divas chu tribal-te nunphung leh khawsak dan chawimawina ní a ni nghal bawk tih a sawi.

Dr K Beichhua pawhin thu sawiin, India rama hnam chi hrang hrang zingah tribal-te chu India ram tiropuitu leh tifamkimtu an nih thu a sawi a,"Mizoram mipui tam zawk hi tribal kan ni a, kan hmasawnna turin central leh state sorkar ṭangkawpin kawng hrang hrangah hmalakna pawimawh tak tak an kalpui mek a ni," a ti.

J a n j a t i ya G a u ra v D i w a s hmannaah hian hnam làm leh zaite entir a ni a; tribal-te hlawhtlinna pholanna hun a nih angin Jeremy Lalrinnunga (weightlifter), James Dokhuma (Padma Shree awardee), Vanhlupuii (zaithiam), Laltluangliana Khiangte (Padma Shree awardee) leh R Lalhmangaiha (entrepreneur)-te chanchin a lem nen entir a ni.