KHAWTHLIR
Thisen pe
Mizoram University NSS unit chuan nimin khan MZU campus-ah thisen pek an huaihawt a, Civil Hospital, Aizawl tan thisen unit 124 an pe a, petute mipa 87 leh hmeichhia 37 an ni. KṬP, Chanmari West Hmarveng Branch pawhin an kohhran hall-ah Synod Hospital tan thisen unit 38 an pe a, petute mipa 33 leh hmeichhia panga an ni.
Dy Mayor-in hawng
Mission Veng Bazar panna pedestrial bridge dawh thar chu nimin zing khan Aizawl Municipal Corporation deputy mayor R Thanglura'n a hawng.
Lei dawhna atan hian Rs 58,09,000 hman a ni.
Khehpuam man
Aizawla hmunpui nei Assam Rifl es leh Excise & Narcotics department mite chuan November 13, 2022 khan Dinthar, Aizawlah pseudoephedrine
(khehpuam) mûm 1,98,000 an man a, a neitua puh mi pali an man bawk. Khehpuam an man hi Rs 11,88,000 hû a ni.
Aizawl North-II bialtu
MLA Dr Vanlalthlana chuan nimin khan Aizawl North College hnenah college library-a dah tur lehkhabu ṭhahnem tak a hlan. Lehkhabute chu Mizo lehkhabu rotling leh dahṭhatna atana pawimawh bika ngaih bu 200 leh UPSC exam atana inbuatsaihna puitu tur lehkhabu 100 vel a ni a, chumi hmang chuan college library-ah Mizo Literature Section leh UPSC Exam Section siam a ni dawn a ni.
Health clinic centre
Assembly deputy speaker Lalrinawma chuan nimin khan a bial, Tuikum constituency-a Chhingchhip Mualpui leh Phulmawi khuaah health clinic centre thar a hawng. MLA chuan, "Hriselna leh hmasawnna hi thil kal dun zel a nih avangin kan ramin hma a sawn zel theih nan mipui hriselna hian kawngro a su nasa hle a ni," a ti.
Hnathawh endik
Aizawl West-II bialtu MLA Lalruatkima, minister of state chuan November 14, Thawhṭanni khan a bial chhung Vaivakawn leh Dawrpui Vengthara
hmasawnna hna thawh mek leh hmachhawpte a en a; bialtu AMC corporator Lalfakzuala Chenkual leh khawtlang hruaitute'n an ṭawiawm.
Workshop-ah tel
National Workshop on LSDG Theme-1: Pover ty Free and Enhanced Livelihood Village chu November 14, 2022 khan Kochi, Kerala-ah neih a ni a, Mizoram aṭangin Kawnpui VC-III hnuaia village council, self help group leh women farmer club hmalakna entir a ni. Workshop hi thingtlang khuate ei leh bara an intodelh theih nan leh eizawnna ngêlnghet an neih theihna tura inràwnkhawmna a ni.
Startup workshop
Planning Board vice chairman H Rammawi chuan nimin khan Taxation auditorium-ah Accelerating Startup Calibre & Entrepreneurial Drive buatsaih Mizoram Startup Workshop a hawng. Workshop-ah hian Department for Promotion of Industry and Internal Trade, Planning department, Mizoram University leh kutkawih eizawnnaa mi hlawhtlingte'n hun an hmang.
PMAY-HFA (U) sawiho
Champhai District Screening Committee on PMAY-Housing for All (Urban) chu an chairman James Lalrinchhana, bawrhsap hoin nimin
khan an ṭhukhawm. Champhai khawpuia cheng chenna in nei lo zingah ṭanpuina dawng turin DPR 1 Champhai 03-ah mi 2,341, DPR 2 Champhai 26-ah mi 947 leh DPR 3 Champhai 32-ah mi 741 thlan an nih tawh thu tarlan a ni.
Heart screening camp
RBSK , Mizoram leh Shija Hospitals and Research Institute, Imphal chuan nimin khan Aizawl West DEIC leh Kulikawn YMA Hall-ah nau piang hlim aṭanga tleirawl kum 18 inkar, lung (heart) lama harsatna neite tan Congenital Heart Disease Screening Camp vawi ngana an buatsaih a, Health principal director Dr T Lalhmangaihi'n a hawng. Campah hian mi 250 chuang an inentir a ni.
Gas home delivery
Lunglei DCSO Carolyn LB Khiangte hoin nimin khan a pisaah Lunglei leh Hnahthial district-a LPG home delivery kalpui dan tur sawiho a ni. LPG home delivery chu agency tinte'n veng thlan bikah kalpui turin an rél a; Southern Gas Agencyin Salem Vengah, EL PEE Gas Agency-in College Vengah, Zomawi Gas Agency-in Chanmari-ah leh Fidelia Gas Agency (Hnahthial)-in Hnahthial Electric Vengah kalpui phawt tur a ni.