District 2-ah chiah Covid-19 vei an awm

Nimin tlai khan Mizoramah Covid-19 vei enkawl lai mi 13 chiah an awm a, thla 20 pumhlûm lo deuh chhunga Mizorama hripui vei enkawl lai an tlem ber ṭum niin, Aizawl leh Lunglei district-ah chiah positive an awm.

IDSP aṭanga thu dawn danin, November 14, Thawhṭanni khan Mizoramah Covid-19 vei mi pahnih hmuh chhuah a ni a, Aizawl leh Lunglei district-a mi pakhat ve ve an ni. Swab sample 173 endik aṭangin positivity rate 1.16% a ni.

Hripui vei enkawl lai zinga dam tawh mi 23 chu nimin khan chhuahtir an ni a; Covid-19 vanga thi an awm lo. Nimin kha March 21, 2021 hnua Covid-19 active case tlem lai ber a ni.

Aizawl leh Lungleiah chiah hripui vei an awm tawh a, district dang pakuaah an awm tawh lo. Mizoramah swab sample 19,90,227 endik tawh niin, Covid-19 vei 2,38,916 hmuh chhuah a ni tawh a, a pumpuia positivity rate 12.01% a ni. Nimin tlai dar 3 thlengin mi 2,38,177 (99.69%) chhuahtir an ni tawh a, mi 726 (0.30%) thi tawhin, enkawl mek mi 13 (0.01%) an awm.