Zoram mipuiin ZPM-ah beiseina an nei - MPC President

MPC president Lal­hmangaiha Sailo chuan nimin khan an party pisa-ah thu sawiin, "Saltanna aṭanga khai chhuak turin Ṭangrual Pawl - Zoram Peoples Move­ment (ZPM) ah Zoram mipuite'n beiseina thuk tak an nei," a ti.

Lalhmangaiha Sailo chuan Zoram mipuite'n tuna kan dinhmun ṭha lo tak saltanna aṭanga khai chhuak turin ZPM -ah beiseina an nei thuk hle nia sawiin, " ZPM hmel an han hmuh a an thlamuan ziate khaw tinah kan hmuhin lawmawm kan ti hle," a ti a, kan ram hruaitu lian pahnih chanchin Zoram kilkhawr ber thlengin a ṭha zawng hriat tur a awm lo nia sawiin, pawi a tih thu a sawi.

ZPM-in sorkarna an siam hunah chuan thawnthu ṭha lote a rang thei bera tihbo a nih tur thu sawiin MPC President chuan, "Ram hmasawn nan, mipuite chanvo dik tak pek a ni tawh dawn a ni," a ti a, Zoram mipuite chu dawhthei taka lo nghak hram hram a, ZPM lo ṭawiawm zel turin a sawmin, a ngen a ni.