Naupang khuaikhem dona ni hmang Thla 7 chhungin CWC-ah case 104 a lut

Aizawl District Child Pro­tection Unit (DCPU) leh CARE World Vision India chuan nimin khan Chanmari YMA Hall-ah 'World Day for Prevention of Child Abuse' an hmang. He hunah hian sorkar kum kal mekah Chile Welfare Committee (CWC)-ah case 104 a lut tawh tih tarlan a ni.

World Day for Prevention of Child Abuse hmannaah hian thupui chu 'India rama cheng mi tinin naupang mipat hmeichhiatna lama khuai khemna an tawh ṭhin titawp turin mawh phurhna kan nei' tih a ni a; Aizawla high school hrang hrang zirlaite an tel a, Social Welfare director Laldikkimi khuallian a ni.

Laldikkimi chuan, Mizo­ramah hursualna lama dan bawhchhiatna, POCSO case report a sang tial tial chu ngai­mawhawm a tih thu a sawi a; sorkar kum kal mekah, April-October chhung ringawtah pawh CWC-in case 104 an dawn tawh thu a sawi.

SWD Director chuan, CWC-a case report a san zel chhan nia lang chu, Mizoram State Child Protection Society leh Social Welfare Department ten mipui zirtir kawngah hma an la nasa a, mipuiin SWC-ah zualko nachang an hriat tak vang nia a lan thu a sawi bawk.

World Day for Prevention of Child Abuse hmanna inkhawm hi Aizawl DCPO James Lalthang­mawia'n a kaihruai a, LPO Lal­tlansangi Fanai-in POCSO Act 2012 leh Juvenile Justice (Care and Protection of Children) Act 2015 chungchang a sawifiah. Police department, Aizawl CWC leh Juvenile Justice Board hotute pawhin thu an sawi.

Inkhawma telte hian mipat hmeichhiatna hman khawlohna laka fihlim tur leh mi dang chunga harsatna thlen lo tura intiamin, pledge board-ah hming an ziak a ni.