Mizote hi co-operation movement Hlawhtlinpui ber kan ni thei a ni - Hawla

Registrar of Cooperative Societies leh Mizoram State Cooperative Union (MSCU) ṭangkawp chuan nimin khan Assembly Annexe conference hall-ah 64th All India Cooperative Week pualin Cooperative Society member-te intawhkhawmna hun an buatsaih a, chief minister Lal Thanhawla'n a hman pui a, Mizote co-operation movement hlawhtlinpui ber kan nih theih thu a sawi.

Chief Minister hian co-operative movement chu Mizote tan thil thar a nih loh thu sawiin, "India ramin co-operation huangah hma a lak hma pawhin, hnathlang leh Mizo tlawm­ngaihna kaltlanga thawhhonate leh midangte nena inpeizawna khawsakho,

ṭanpui ngaite ṭanpui, sem sem dam dam eibil thi thi tih kan lo nunpuite kha cooperation movement thiltum pawimawh tak a ni sa hrim hrim," a ti.

Hmalakna kawng tinrengah ṭanrual leh thawhhona chu hlawhtlinna a nih thu sawiin CM Hawla chuan, "Bank leh sum puk tur pechhuak thinte tan pawh pawl leh society anga intelkhawmte puih chu thil awlsam a ni," a ti a, hmasawn tuma ṭanlak duh sum hlawm nei si lote tan society a mi dangte thawhpui chu kawng awlsam zawk a nih thu a sawi.

Lal Thanhawla chuan Mizo society chu

ṭanrual leh thawhho thiamsa kan ni ang, India rama co-operation movement hlawhtlinpui ber kan nihtheih lohna tur awma a hriat loh thu sawiin, "Kan thlenchina kan hlawhtlin leh hlawhchhamnate zirchianga kan inenfiah a pawimawh. Lehkhathiam zawkten ṭan inlak phawt chuan co-operative society huang­chhungah mai ni lo, Mizoram tan hlawhtlinna liantham zawk a awm ngei ka ring," a ti.

Chief Minister chuan Mizote'n Pathianin khawvela sik leh sa ṭhatberna, thlai chi tinreng ṭhatna hmunah min dah tih kan hriat a ngaih thu sawiin, "Kan ram leilung hausakna erawh keimahni haichhuah chawp tur a ni. Heng kan hnathawh tur zawng zawngah leh kan hmachhawpte tihlawhtling tur pawh hian cooperative movement-ah hian kan hlawhtlin a pawimawh hle a ni", a ti a, co-operation kalpui dan mipuite hrilhhriat a pawimawh thu a sawi.

Thusawitu dang Co-operation minister Vanlalawmpuii Chawngthu chuan sorkar

aṭanga ṭanpuina beisei reng nih tum loa, sorkarah pawh sum chhunglut thei tura ṭan lak chu society member-te rilru put hmang tur a nih thu sawiin, "Cooperative society hmalakna huangah tupawh ṭanlak tum a ­piang an leng vek. Sum lama pachhe zawk leh khawsak harsa zawk tan pawh cooperative society a tel ve chu hmasawnna kawnga bulṭanna remchang tak a ni," a ti.

Week puala inkhawm buatsaih hi MSCU president Lianthangpuia'n kaihruaiin, Chief Minister-in MSCU Souvenir a tlangzarh a, Co-operation Minister-in MSCU Bye-Law tih a tlangzarh thung.