Boruak inthlak thleng chungchang zirho

Mizoram Science, Technology & Innovation Council (MIRSIC) hnuaia ‘Mizoram State Climate Change Cell’, NABARD Consultancy Services (NABCONS) leh Indian Himalayas Climate Adaptation Programme (IHCAP) ṭangkawp chuan nimin khan Aijal Club-ah ‘Level 1 Orientation Programme for Legislators & Bureaucrats on Capacity Building for Climate Change Adaptation Planning’ an buatsaih a, chief minister Lal Thanhawla'n a hmanpui.

Chief Minister chuan khawvel ṭhangzelah mihring leh mamawh pung zel chuan nasa takin boruak, sik leh sa a khawih danglam mek tih sawiin, "Mizoramah ngei pawh kumtira ruahsur chu November thleng hian a la bang loa, khaw ṭhat chhung a rei loh em avangin sorkar hmalakna pawh a tisawt lo hle a ni. Hei hian climate change leh environment inthlak danglam chak lutuk laka kan inven theihna tur leh chumi mila kan nunphung insiamrem dan tur chu mitin mawhphurhna leh tihmakmawh a ni," a ti.

Kum 50 kalta chhung khan climate change chuan Mizoram a ni emaw Himalaya tlang sang ber berte a ni emaw khawpui lian tak tak te ni emaw nasa takin a nghawng mek zel tih sawiin Lal Thanhawla chuan, "Chuvangin eng sorkar pawhin ram hmasawnna tura rua­hmanna a siam zawng zawngah boruak, sik leh sa inthlakdanglam chu vei a, chumi mila ruahmanna siam zel an tum tawh a ni," a ti a, Mizoram thing­tlang khuate mangan rukna pakhat chu an tuihnate kang chat mek a nih thu a sawi.

Planning minister Lalsawta pawhin thu sawiin, "Khawvel sik leh sa leh khawchin danglam chak ta lutuk chu tihtakzeta vei a ngai tawh a, mitin a nghawng phak avangin mawhphurtu kan ni vek a ni. Mizoram chhung ngeiah pawh buh leh thlai ṭhatna ṭhin hmunte chu a inthlak zel a, natna hri kan hriat ngai lote pawh a rawn hluar ṭan hial a ni," a ti.

Zirhonaah hian mithiam hrang hrangte'n thupui hrang hrang hmangin thu an sawi a ni.