Dan loa Mizorama pem lut an awm ngei - Tlabung MZP

Tlabung MZP chuan thuchhuah siamin, Assembly Session neih zawh takah Home minister R Lalzirliana'n kum 5 kalta chhungin ram dang aṭanga dan loa Mizorama pem lut an awm loh thu sawi mah se, dan loa rawn pem lut an awm ngei tih mipuite'n hria se an duh thu an tarlang.

Tlabung MZP chuan R Lalzirliana hian official record behchhana sawi a nih avangin amah chu demna tur a awm loh thu sawiin, "Official document-a ziah luh a nih miau loh chuan, dàn loa ramri kana Mizorama inbengbel an awm thei lo. Dàn loa ramri kan (Illegal crosser) an awm tih manchhuah a nih rualin, dàn angin an chungah hremna lekkawh nghal mai tur a ni. Chuvangin, official record-ah chuan Mizoramah illegal immigrants an awm lo anga chhin­chhiah a ni dawn tih a chiang em em a ni," an ti.

Chakma hnam beh­chhana din pawl ṭhenkhat leh Chakma mipuiten official record avang hian Mizo mipui leh tlawm­ngai pawl ṭhenkhatte dâwt ṭanchhan angah min ngaih phah nia sawiin Tlabung MZP chuan, "Hei hi a dik lo hulhual a, official record hi dàn loa ramri kana rawn pem luh (illegal immigration) chung­changa kan din­hmun dik tak tarlangtu-ah a pawm tlak loh, tih hi Mizoram mipuiten min hriatpui se kan duh," an ti a, Mizorama Chakma-te pun chak dan en hian, inthlahpun vang ni loin, illegal immigrant tam vang a nih thu an sawi.

Tlabung MZP chuan politics-a chan ṭhat duh vang ngawt emaw, mahni khingpuite hneh duh vang ngawt emaw a communal politics tuipui lo turin political party-te an ngen a, "Dân loa kan rama rawn pem lût vei tak tak tute chu, ràl khat aṭanga hemi chungchang chai duhtawk mai loin, dàn hrulah awm­ze neia hma lak a nih theih na'n, a hmunah thil awmdan rawn zir­chiang turin kan ngen. A ṭul anga thawhpui leh ṭanpui turin Tlabung MZP leh NGO hrang hrangte eng tik lai pawhin kan inhawng em em a ni," an ti.