Political party corrupt thlannaah INC-in palina an hauh - ZNP VP

ZNP vice president Kenneth Chawngliana chuan nimin khan an party pisa-ah thu sawiin, Indian National Congress (INC) chu khawvela independent rama political party zinga corrupt ber thlannaah palina an nih thu a sawi.

Tun hma deuhin INC hian India ramah rorelna an chan deuh vek ṭhin thu sawiin ZNP Vice President chuan, "An hruaitute an corrupt avangin hmasawnna a kal hlei thei lo a, tunah chuan India mipui an lo ṭhangharh ta a, hneh takin Congress chu paih thlak a lo nita zel a ni. Khawvela independent ram 129/130 vel zinga party corrupt ber thlannaah INC hi palina an ni," a ti.

Kenneth Chawng­liana chuan ramin hma a sawn tak tak theih loh chhan chu INC-in sorkar laipuiah kum 60 chuang ro an rel vang a nih thu sawiin, "Hemi chhung hian state tam zawkah ro an rel vang a ni. Central lama congress inawpna, family dynasty kan tih leh kan duh loh em em chhawm nungtu chu Mizoram Congress party hi an ni," a ti a, Congress party chu chhungkaw sorkar siam ching leh party corrupt-ah a puh.