MZU Convocation vawi 12-na hmang Zirna hi dam chhung atan a ni - CM Hawla

Mizoram University Convocation vawi 12-na chu nimin khan MZU Multipurpose Hall-ah hman a ni a; khuallian chief minister Lal Thanhawla chuan zirna chu class room chhunga tawp mai loin dam chhung daih a nih thu a sawi.

MZU hian nikum khan Convocation hi an hmang lo a, kumin Convocation-ah hian academic session hnih chhunga mite tan hun hman a ni.

Bachelor leh masters degree bakah doctor of philosophy leh master of philosophy te nen an vaiin medal 6970 pek an ni a, a hmuna medal dawng chu 1614 an ni.

Chief Minister chuan zirlai chhuak tate chu anmahni duhthlanna dik an hman a hun tawh thu sawiin, "Zirna hi class room chunga inṭana tawp zui mai a ni lo, dam chhung atan a ni zawk," a ti a, hmalam pana ram leh hnam hmasawnna thlen thei turin a fuih.

Lal Thanhawla chuan department hrang hrang aṭanga hlawhtlinna chang tharte a lawmpui thu sawiin, "Zirlaiten an zirlai ṭha taka an zir theih nana a phena hna pawimawh thawktute hriatreng a pawimawh. Zirlai nu leh pate bakah anmahni zirtirtu faculty leh staff-te hnathawh hi a hlu hle a ni," a ti.

Kum 2030-ah chuan India ram chu khawvela thiamna sang berte zinga mi a nih tur thu sawiin CM Hawla chuan, "Ram chhung state zingah Mizoramin ziak leh chhiar thiam percentage san lama a tluk loh Kerala chiah a ni chu hmasawnna ropui a ni," a ti a, thil thar hmu chhuak thei tur khawp thiamna neih chu chona lian leh pawimawh a nih thu a sawi.

Chief Minister chuan MZU a chhuan thu sawi zuiin, "North East India-a Central University naupang berte zinga mi a ni a, National Assessment and Accreditation Council (NAAC) in an endik hmasak ber ṭum khan 'A' Grade pek nghal a ni. Tun hnai maiah National Institutional Ranking Framework (NIRF) chuan India rama Educational Institution 3000 chuang zingah a ṭha 94-naah a thlang a, ram chhunga University 700 rual zingah 58-na a ni bawk," a ti.

Convocation-ah hian MZU vice chan­cellor KRS Sambasiva Rao pawhin thu sawiin, "Mizorama ka awm chhungin MZU hi India rama ṭha berte zinga mi nihtir hman ka tum," a ti a. Thiamna tak nei tura zirlaite chher, hmeichhe dinhmun tihhmasawn leh state chhung mai ni loin state pawn thlenga hna thawk thei tura zirlai te chher hriam chu a hna pawimawh tur a nih thu a sawi.

MZU hi July 2, 2001-a din niin tun dinhmunah sikul pariat hnuaiah department hrang hrang 33 a awm mek a, tun academic session chhung hian zirlai leh zirbingna bei lai 2000 chuang inziak lutin heng zinga 16% chu Mizoram pawn aṭanga rawn kal an ni.

A hmuna medal leh
degree sem chhuah dan
Gold Medal 88
Doctor of Philosophy 58
Master of Philosophy 39
Master's Degree (Arts) 298
Master's Degree (Science) 287
Master's Degree (Social Work) 34
Master of Commerce 26
Master's Degree (MBA) 30
Master's Degree (MJMC) 19
Master's Degree (Lib & Info.Sc) 31
Bachelor of Technology 33
Master's Degree (M.Ed.) 10
Master's Degree (MCA) 14
Bachelor's Degree (Arts) 395
Bachelor of Science 203
Bachelor of Law (LLB) 1
Bachelor of Social Work 1
Bachelor's Degree (B.Ed.) 29
Bachelor of Bussiness Administration 29
Bachelor of Commerce 78
RIT 2
* A hmuna candidate inlan - 1614
* Candidate inlan thei lo - 5356
* Degree pekchhuak zat - 697