Delhi Police-ah Mizo 20 chuang an awm ; NE case zingah Mizo case a tam lo

Delhi Police-a joint commi­ssioner (North East changtu) David Lalrin­sanga chuan, New Delhi-a India hmarchhak mi case an khawihah Mizote kaihhnawih case awm ve nual mah se a tam lutuk loh thu leh, Delhi Police-ah Mizo 20 chuang an awm mek thu a sawi.

Chanchinbumi ṭhen­khatte'n Thawhṭannia a pisaa an kawmnaah zawhna chhangin David Lalrinsanga chuan, Delhi Police-a NE Cell-ah Mizote case a tam lem lo tih a sawi a, "Manipur lam mi case a tam ber. Mizo case a tam lutuk lo a, state malah a tlem pawl a ni ang," a ti.

David Lalrinsanga chuan, Delhi Police-ah Mizo 20 chuang an awm thu a sawi a; Delhi Police NE Cell a awm hnuah India hmarchhak mite'n Delhi-a harsatna an tawh ṭhin chu a tlem phah thu leh, thawktu mi 38 an awm mek a, thawktu mi 100 chuang fe an dil belh thu a sawi bawk.

India hmarchhak mi, Delhi-a buaina tawk zinga 20% vel chu Delhi-a awm si, Gurgaon lama hna thawkte an nih thu sawiin, chu chu kár a hlat tham deuh vang a nih thu a sawi a, "Kan tlangnel ta lutuk ṭhin a, ṭhenkhat chu an lo rui tawh bawk ṭhin si a, hei vang hian hmuhsitna tam tak a awm ve ṭhin. NE mi nih vanga bei ni loin, zu ruih vanga insualte an ni ve fo," a ti.

Hnam dang hmuhah inthuamna fimkhur a ngaih ve reng thu sawiin, "NE mi hrim hrim hi vai ho hian min zuam fo a, a chhan awm tur tawkin lepchiah deuh leh awm ṭha duh lote an awm ve ṭhin bawk a," a ti a; mi tlemte awm ṭha duh lo vangin a hnampuite'n zuam an hlawh phah fo thu a sawi.

Delhi Police Joint Commi­ssioner chuan, Delhi leh a chhehvela hnathawkte zingah hlawh an hmuh ṭhat loh a, an complaint chuan hma an lakpui ve ṭhin thu te, Mizo zinga buaina leh harsatna tawk tam ber chu Mizo society leh kohhran/inkhawma tel ngai lote an nih fo thu te, Mizo thil tihnaa tel ngai lo an tam thu te, hnam dang ṭawng, a bikin Hindi thiam a pawimawh thute leh nu leh pa bula awm anga awm theih a ni loh avangin chhel a ngaih thute a sawi bawk.

David Lalrinsanga, IPS chuan, India hmarchhak state mi, Delhi-a harsatna tawkte tan bik police biakna tur number siam a nih thu sawiin, harsatna tawkte chu Helpline no. 1093-ah be turin a chah a ni.