Khawtual mite'n khualzinte an ina An thlenna tur ruahmmanna zirho

New Economic Development Policy 2016-17 hnuaia hmalakna, Tourism Department leh ICFAI University ṭangkawp buatsaih, ni hnih awh tur khawtual mite'n khualzinte an ina an thlenna tura ruahmanna, Capacity Building and Rural Homestay Training Programme chu nimin khan Champhai Venglai community hall-ah ṭan a ni a, addl. DC Lalsangpuii Hmar-in a hman pui.

Lalsangpuii Hmar chuan NEDP kaltlanga sorkarin Mizorama Rural Homestay Scheme hmasa ber tur Champhai district-a kalpui a tum chu lawmawm a tih thu sawiin, "Inpuahchahna chi khat homestay partner-te tana training mumal tak huaihawt a ni hi thil pawimawh tak a ni. Champhai chu pipute sulhnu pawimawh tak tak awmna a nih avangin hmalakna tur hmun duhawm leh remchang tak a ni a, hemi kawngah hian mipui, sorkar leh khawtlang kan ṭanrual a ngai dawn a ni," a ti.

Inkhawm hi ICFAI University-a asst. professor Zairemmawii Ralte-in kaihruaiin, resourse person pahnih ICFAI University-a asst. professor pahnih Ramnunmawia Pachuau leh Zairemmawii Ralte-in 'Homestay' tih leh 'Ei leh in thianghlim leh hmunhma enkawl dan' tih thupui hmangin thu an sawi a, zawhna leh chhanna hun hman zui a ni.

Training chhim tur hian Rural Homestay Scheme kalpuina tura thlan chhuah - Vang­chhia, Dungtlang, Vaphai, Zokhawthar, Hnahlan leh Chawngtlai khua aṭangin homestay partner-te an tel a, vawiinah chhunzawm­in practical leh hriat ngai ang angte inhrilh­hriatna hun hman leh tura ruahman a ni.

Homestay hi a awmzia ber chu khualzinte a khaw miten khual ṭha anga mahni ina an lo thlen hi a ni. Mikhualte hi sum chawiin a khaw mite inah an thleng ang a, thlen chin bithliah a awm lo a, zan khat aṭanga a thla ang zawng pawhin an cham thei dawn a ni. Rural Homestay Scheme hnuaiah hian Champhai hi pilot district a ni a, chhungkaw thlanchhuah (homestay partner) ten mikhual thlenna tur pindan / in sa in mikhual an thleng thei ang a, ramchhung leh pawn aṭangin a duh apiang heng khuaahte hian riahchilha an ram chheh­vel fang tur leh, an nunphung leh khawsak anga va khawsaa hun va hmang thei turin ruahmanna siam a ni.