Health Minister leh AMRI Hospital-in Thawhhona awm thei turte an sawiho

Health minister Lal Thanzara leh AMRI Hospital, Kolkata hotute chu Thawhṭanni tlai khan Health Minister pisa-ah an inkawm a, thawhhona awm mek bakah dental implant, bone marrow transplant, neurology clinic leh natna dang enkawl kawnga thawhho dan tur an sawiho.

Lal Thanzara chuan dental implant chu a case azirin medical reimbursement tih theih leh theih loh chi a awm ṭhin tih sawiin, "Chubakah a man a to avangin mi tam takin enkawlna an la thei lo fo ṭhin. AMRI Hospital-in dental implant man tlawm zawka an rua­hman theih chuan mi tam tak tan malsawmna a ni ang," a ti.

Sorkar thuchhuah tarlan danin, AMRI Hospital hotute chuan dental implant-ah hian thawhhona an duan theih mai an rin thu Health Minister hi an hrilh a ni. Health Minister chuan Mizorama ­thluak leh lu lam mi­thiam doctor(neurologist) rawn tur an awm loh avangin damloten harsatna an tawh ṭhin thu sawiin, "Hemi kawngah hian sorkar pawhin harsatna sutkian theih dan kawng dap ṭhin mah se, tun thlengin ruahmanna a la awm thei lo," a ti a, AMRI Hospital chu Mizoramah neurology clinic din dan kawng ruahman pui sak turin a sawm a ni.

Heng bakah hian pum lam enkawlna tur gastro care, hnungzang leh ring na spinal injury leh hnute cancer enkawlnaa thawhhona awm theite an sawiho a ni.