MNF Ṭhalaiin NHM hlawh pek phût

MNF Ṭhalai chuan thu­chhuah siamin, June, 2017 aṭanga nimin thlenga National Health Mission (NHM) hnuaia hnathawk tam takin hlawh an la thei lo chu pawi an tih thu tarlangin, rang taka an hlawh pe turin Mizoram sorkar an phut.

MNF Ṭhalai tarlan danin, kum 2016-2017 atan central aṭangin National Health Mission sum cheng nuai 4779.85 hmuh a ni tawh a, tun sorkar kum kal mek 2017-2018 atan hian central aṭangin cheng nuai 3866 hmuh a ni.

NHM hnuaiah hian mi 2130 hnathawk an awm mek a, heng mite’na thla tina an hlawh hi cheng nuai 300 vel a ni a, central aṭanga sum lo kal aṭang hian an hlawh tur hi thla tin pek zat zat theih ni âwm tak a ni. Chutih laiin NHM hnuaia hnathawk zat­ve aia tam mah nia hriat chuan thla nga chhung zet chu hlawh an la tawh lo a, chhungkaw tam tak an mangang tawh hle.

Mihring hriselna atana thawk ṭhin NHM-a hnathawkte hi Mizoram sorkar hian ngaihsakin an hlawh pe thuai tura an phut thu sawiin MNF Ṭhalai chuan, "Mizoram hmasawnna tura sum lo kalte hi an party hamṭhatna atan NLUP a pawt pêng mai loa a hmanna tur dik taka hmang ṭhin turin Mizoram sorkar kan duh hle a ni," a ti.