DAY-NULM Mela ṭan a ni

Ni li awh tur Deendayal Antyodaya Yojana-National Urban Livelihoods Mission (DAY-NULM) Mela chu nimin khan Millenium Centre roof top-ah ṭan a ni a, UDPA minister Zodintluanga'n a hawng. Mela hi UDPA dept. leh Skill Training Provider Eternity Partners LLP ṭangkawp buatsaih a ni.

Zodintluanga chuan DAY-NULM chu mi harsa zawkte chawikanna leh retheihna umbona tura hmalakna a nih thu sawiin, "DAY-NULM Mela hi mahni kutchhuak leh thiamthilte phochhuah theihna hun ṭha tak a ni a, hmasawnna tam tak a thlen ngei ka beisei a ni," a ti a, DAY-NULM beneficiary-ten an thiam thil an phochhuah bakah massage leh beauty parlour an hawng chu lawmawm a tih thu a sawi.

Ram leh hnam intodelhna kawngah ṭhalaite an pawimawh hle tih sawiin UDPA Minister chuan, "DAY-NULM hmalaknate tihlawhtling tur chuan mipui kan pawimawh a, theihtawp chhuaha hmalam pan ṭheuh tura ṭan lak a ngai a ni," a ti a, NULM programme-a zirlai (trainees) te chu taimakna, rinawmna leh insumtheihna nena zir turin a chah.

DAY-NULM hi Ministry of Housing and Urban Affairs hnuaia programme a ni a, khawpuia mi harsa zawkte ṭanpuina turin September 24, 2013 khan bul ṭan a ni. Mizoramah chuan UDPA dept.-in mission hi an kalpui a, district khawpui pariat leh census town thlanchhuah bik pasarihah hmalak mek a ni.

Mela-ah hian Mission kalpuina atana thawktu Skill Training Provider leh Resource Organization ten stall neiin DAY-NULM hnuaia hmalaknate mipui hrilhhriatna an nei nghal dawn a, stall 77 hawn a ni.