KHAWTHLIR

Hmarcha chin zir
Nimin khan West Phaileng community hall-ah Agriculture dept. hnuaia hmarcha chingtute pualin training buatsaih a ni a, an hun hmanpuitu bialtu MLA Lalrobiaka chuan Mizoram sorkarin kuthnathawktute a duhsak thu sawiin, "Kan mamawh apiang min ngaihtuahsak avang hian ṭhahnem ngai takin i thawk ang u," a ti.

Home Review
Ni li chhung awh tur Children’s Home Review cum Basic Child Protection Training chu, International Headquarters Child Protection department leh Territorial Headquarters ṭangkawp buatsaihin, Salvation Army India Eastern Territory chhunga youth officer, social institution-a officer thawklai bakah school principal leh headmaster-te pualin Booth Mansion conference hall-ah Thawhṭanni khan neih ṭan a ni.

Thisen pe
Prasar Bharti, All India Radio, Aizawl chuan nimin khan an kum 20 tlin lawmna atan Aizawl Civil Hospital tan thisen unit 26 an pe a, thisen petute hi mipa 23 leh hmeichhe pathum an ni. Luangmual Branch KṬP pawhin nimin khan Synod Hospital tan thisen unit 16 an pe a, mipa 10 leh hmeichhe parukin an pe a ni.

NLUP sem
Commerce & Industries dept. chuan nimin khan Ramhlun Indoor Stadium-ah NLUP sem inkhawm an buatsaih a, minister R Romawia leh State Planning Board vice chairman H Liansailova ten an hman pui. NLUP ṭanpuina hi mi 363 te hnenah Rs. 11,074,500 sem a ni.