AMC hotute'n property tax an sawifiah MPCC-in thu dik lo an thehdarh - Mayor

Aizawl Municipal Corporation (AMC) hotute chuan nimin khan Aizawl Press Club-ah thuthar thehdarhtute kâwmin, property tax tihsan chungchang an sawifiah a, Mizoram Pradesh Congress Committee (MPCC) chu thu dik lo thehdarhah an puh.

Aizawl mayor Lalrinenga Sailo chuan, AMC-in property tax hmangin Aizawl mipui an rawk mek tiin, thu dik lo tihdarh mek nia a lan thu a sawi a, "Hetianga thu dik lo tak mai thehdarh a ni leh a ṭha lo zawnga mipui rilru kaihruai thei thil a thleng hi AMC chuan pawi a ti tak zet a ni," a ti.

Sorkar laipuiin municipal-te chu property tax an lak tipung tura a tih thu sawiin Mayor chuan, "Kan tipung lo a nih chuan kan sum dawn tur min pek loh an tum a ni. Chuvangin, AMC pawhin property tax chhûtna 3% of annual property value (APV) ni ṭhin chu 0.42%-a tipungin 3.42% APV a lo ni ta a ni," a ti a; a punna rate chu a hniam thei ang ber a nih thu a sawi.

Lalrinenga Sailo chuan, kum 2015-16 aṭangin Aizawlah property tax khawn ṭan a nih thu sawiin, "Kum sarih chhung sorkar laipui nawrna nasa tak hnuaiah vawi khat mah tihsan a la ni lo. Nawrna a nasat tâk avangin kuminah tihsan a ni a, mipui pawhin an hrethiam tlang tih a hriat," a ti.

AMC Mayor sawi danin, kumina chhiah chawi pung thut anga sawite chu a tlangpuiin in sak belh vang te, kum hmasa lama data dik tâwk lo hmanga chhiah pek ṭhin vangte leh data dik zawk neih a nih hnua chawi tur pangngai lan tâk vangte a ni a; a dik taka pe sa ṭhin tan a san belhna a tam lo a ni.

Property tax khawn ṭan a nihin self-assesment kalpui a ni a, in neitute'n an in len zawng, hmanna, sak phung leh property tax chhûtna atana mamawhte AMC-ah an thehlut a, chumi hmang chuan property tax pek a ni ṭhin.

Data dik tâwk lo a awma a lan avangin kum 2016 leh kumin kum tìrah AMC leh local council-te'n Aizawla in zawng zawng an enfiah a, chumi hmang chuan property tax chhûtna dik zawk siamin, a dik lo eng emaw zatte tan an pek tur zat dik tak a lang. Ṭhenkhat a tlâkhniam laiin, ṭhenkhat chu a pung.

Property tax danglam theihna chi 4,000 vel a awm a; in awmna hmun, mahni ngeiin luah leh luah loh, sumdawnna atana hman leh hman loh, sumdawnna atana mi dang hmantir leh hmantir loh, in upat zawngte chu a langsar zual a ni.

Aizawl Mayor chuan, kum 2021-22 khan property tax aṭangin cheng nuai 300 chuang hret an hmuh thu sawiin, "Khawpui dang municipal-te chhiah lak nena khaikhinin a tam lo hle. Aizawl mipui chanve vel chenna Shimla Municipal Corporation-ah property tax aṭangin cheng vbc. 19 lâk a ni a, Agaratala Municipal Council chuan cheng vbc. 10 vel an la lut," a ti.

Urban local body-te chu sorkar laipuiin mahni intodelh tura a duh thu sawiin Lalrinenga chuan, "Sum dawn tur a titlem telh telh a, sum lak luh titam turin a nawr reng thung," a ti a; sum lak luh tihpunna atana a ngaih pawimawh ber pakhat chu property tax a nih thu a sawi.

AMC hotute chuan, tih dik tâwk lo leh fel tâwk lo a awm palh theih thu sawiin, "Kan ti dik famkim kan ti lo. Dik tâwk lo awma ngaite tan complaint theih reng a ni a, siamṭhat leh teh ṭhat kan inhuam reng a ni," an ti a; property tax chawi zat dik tâwk loa ngaite chu complaint thehlut turin an chah a ni.

MPCC TARLAN AMC-IN AN SAWIFIAH
1) Punna 2,221.79% : He hi Kanan LC area-a in a ni a, May 4, 2016-ah survey niin, chutih lai chuan in pangngai (ordinary building), chhâwng nei lo a ni. Ft. 27X24-a zau a ni a, property tax Rs 53 an chawi. October 17, 2018-ah survey nawn niin, permanent building chhâwng thum an lo sa zo tawh a, an tax chawi chu Rs 780-in a pung. March 9, 2022-ah survey leh a nih chuan chhawng riat a lo ni tawh a, chhiah Rs 18,110 an chawi a ngai tawh a ni.

2) Punna 437.71% : August 5, 2016-ah enfiah a ni a, chhâwng khat, a dung ft. 16 leh a vâng ft. 11 niin, chhiah chawi zat Rs 128 a ni. March 2, 2022-ah teh ṭhat a ni a, chhawng nga a lo ni tawh a, chhiah pek ngai chu Rs 6,682 a ni tawh.

3) Punna 389.48% : May 3, 2016-a enfiah a nih laiin chhawng li a ni a, chhiah chawi zat Rs 1,198 a ni. April 21, 2022-a teh ṭhat a nihin chhawng nga a ni tawh a, a san zawng leh a hman dante a danglam vek tawh bawk avangin property tax Rs 5,864 an chawi a ngai tawh a ni.