International Tourism Mart 2022 ṭan a ni

Nimin khan Mizoramah Inter­national Tourism Mart (ITM), 2022 ṭan a ni a, ITM puala Mizoram sorkarin Lammuala State Mega Exhi­bition a buatsaih chu Commerce & Industries minister Dr R Lalthangliana'n a hawng.

Commerce & Industries Minister chuan, tun hnaiah Tourism department a ṭhang chak hle niin a sawi a, "Hetiang thil pawimawh leh hautak zet ITM 2022 kan thleng thei hi a lawmawm tak zet a, hei hian tourism sector-ah Mizoram mai bakah, India hmarchhak state-te tan bung thar min kaitir ngei se ka duh," a ti.

Tourism industry chu khawvel ram dangah chuan sum hnár berah hman a nih thu sawiin Dr R Lalthangliana chuan, "Mizoramah pawh tun sorkar kal lai hian tourism hi industry-ah kan puang a, hemi hnu hian hmalak dante pawh thlak danglam a ni," a ti a; chumiin rah ṭha a chhuahte hmuh mek zel a nih thu a sawi.

ITM 2022 hi hmarchhak state-te'n tourism lama hmasawnna an neih theihna turin Ministry of Tourism-in a buatsaih ṭhin a, kum 2013-ah buatsaih ṭan niin, hmarchhak state hrang hrangte'n an inthlen chhâwk ṭhin a, kumin hi Mizoramin a thlen vawi khatna a ni. Exhibition-ah hian stall hrang hrang 76 a awm a, November 16-19, 2022 chhungin chawhma dar 11 aṭanga zan dar 9 thleng tlawh theih a ni ang.

Exhibition hawnnaah hian Tourism minister Robert Romawia Royte chu khualzahawm a ni a; Tourism Development Board vice chairman TC Pachhunga, Tourism secretary Manisha Saxena leh Commerce & Industries secretary Esther Lalruatkimi te bakah, mi pawimawh dangte an tel.

ITM 2022 hi zanin hian Union Tourism minister G Krishna Reddy-a'n R Dengṭhuama Hall-ah a hawng dawn a, DoNER minister of state Ajay Bhatt, chief minister Zoramthanga leh minister dangte an tel dawn. Cultural programme buatsaih a ni bawk ang. ITM-ah hian hmarchhak state pariat an tel kim a, anni bakah, ram chhung hmun dang aṭangin tour operator-te an tel a ni.