Hachhek bialah total bandh ṭan

Hachhek biala kuhva chíngtute'n kuhva an tharte hralhna kawngah hun rei tak harsatna an neih tawh avang leh harsatna chinfelna tura Mizoram sorkar aṭanga hmasawnna an la hmuh loh avangin Hachhek Bial Kuhva Chingtu Pawl (HBKCP) chuan nimin aṭang khan tiam chin awm loin Hachhek bialah total bandh an huaihawt.

HBKCP hian November thla tìr lam khan sorkar pisa kai tur an lo dang tawh a, chumi hnuah November 15 thleng sorkar hmalakna ngaihchàn an rél a; sorkar aṭanga thu lawmawm an hmuh loh avangin November 15, nimin zing dar 6 aṭang khan total bandh an kalpui ta a ni. Mipuiin an thlàwp ṭhat avangin nimin chawhnu dar 3 khan an titàwp lailâwk a, vawiin hian zing dar 6 aṭangin bandh an kalpui chhunzawm leh ang.

An ruahman dan angin, nimin zinga bandh an kalpui ṭan aṭangin khaw hrang hranga society leh association member-te chu an khua ṭheuhah an duty a, khaw dáia kawngpui pengṭhuamahte an duty bawk.

Sorkar pisa, zirna-in, dawr leh kawngpuite khâr a ni a, duty-a che chhuakte tih loh chu khawlaiah chhuahvah phal a ni lo a; khawlaiah lirthei tlan hmuh tur a awm mang lo. Bandh avang hian buaina chhuak a awm hriat a ni lo a, harsatna lian tham thleng a awm rih lo.

Total bandh hian Power & Electricity, PHE leh medical duty te, chhiat tawhna leh dam lohna thila veivah ṭul te, bawnghnute sem leh chanchinbu sem te, chanchinbumite leh force mite a huam lo a ni.