Hmarchhaka NIT ṭha ber nih kan tum - NIT-Mizoram Director

National Institute of Technology (NIT), Mizoram director Prof. S Sundar chuan November 15, Thawhlehni zan khan Mizoram University Auditorium-ah thuthar thehdarhtute a kâwm a; NIT-Mizoram chu hmarchhaka NIT zinga a ṭha berah siam an tum thu a sawi.

Prof. S Sundar chuan, a zir chhuahna IIT-Madras nen ṭha taka an thawhho thu sawiin, "Top professor leh top scientist-te rawn kalin, kan zirlaite an zirtir ṭhin. IIT-Madras Alumni lam pawh rawn kalin, NIT-Mizoramin hma a sawn zel theihna atan theihtawp min chhuahpui. Germany ka tlawh dawn a, an college ṭha ber berte nen thawhho theih dan tur kan zawng dawn," a ti.

NIT-Mizoramin zirtirtu a neih ṭhat tâwk thu sawiin S Sundar chuan, "Zirtirtu ṭha tak tak kan nei a, hma an sawn zelna atan administration lamin theihtawpa kan puih an ngai," a ti a; infrastructure lamah hma an sawn zel tur thu a sawi.

Lengpui rama NIT-Mizoram hmun tur tihfel ṭêp a nih tawh thu sawiin NIT Director chuan, "Kan ram tur kan luah thuai theihna atan Mizoram sorkar hotute'n theihtawp min chhuahpui. Kan harsatna tawh ber pakhat, forest clearance a fel ṭêp tawh a, Mizoram sorkarin a tih tur a ti tawh a, keini lam pawhin kan tih tur kan ti zel. Hun rei lote chhungin Lengpuia kan hmun tur hi kan hmingin a awm tawh ang," a ti.